Astana
Josparly jöndeu jūmystaryna bailanysty Nūrsūltan Nazarbaev halyqaralyq äuejaiynyŋ ūşyp-qonu jolaǧy 10-21 qyrküiek aralyǧynda kündızgı uaqytta jabyq bolady. Jöndeu jūmystary jergılıktı uaqyt boiynşa saǧat 09:00-den 13:00-ge deiın jürgızıledı. Osyǧan bailanysty äuejaiǧa tüske deiın ūşyp keletın jäne ūşatyn barlyq äue baǧyttary keiınge şegerıledı.
Almaty
Almatyda qatar otyrǧan körşılerdıŋ tatulyǧyn därıpteu maqsatynda «Sälem, körşıler!» atty mädeni seiıl öttı. Kündızgı seiılge şyqqan körşıler
interaktivtı installiasiiany tamaşalap, säulet plenerıne qatysyp, sport oiyndarynda baq synady.
Qyzylorda oblysy
«Batys Europa-Batys Qytai» tranzittık dälızınıŋ Qyzylorda oblysyndaǧy bölıgı 2021 jylǧa qarai aqyly türde qyzmet körsetetın bolady. Ol üşın Türkıstan jäne Aqtöbe oblystarymen şekaralas bölıgınen ötkızu beketterın salu josparlanyp otyr. Bügınde kürejoldaǧy kölık aǧymy täulıgıne 9 myŋǧa jetken.
Aqtöbe oblysy
Aqtöbede «Analarǧa taǧzym» ruhani ortalyǧy aşylady. Bıregei joba qazaq halqynyŋ ūly analarynyŋ erlıkterın nasihattau baǧytynda qyzmet etedı. Nysan qūrylysyna mesenattar 350 mln teŋge qarjylai kömek körsetken. 150 şarşy metrlık üş qabatty ǧimaratta ūlttyq ülgıde jasalǧan muzei, körme zaly men üiırmeler ornalasady.
Jambyl oblysy
Oblys şaruaşylyqtaryna ettı siyrlardyŋ alǧaşqy legı Reseidıŋ Altai öŋırınen äkelındı. Atap aitqanda, 600 bas aqbas tūqymy Moiynqūm audanyna jetkızıldı. Mūndaǧy şarua qojalyǧy būǧan deiın 1 myŋ 700 bas «qalmaq» tūqymyn äkelıp jersındırgen. Aldaǧy uaqytta osy aimaqqa 36 myŋdai asyltūqymdy ırı qara mal satyp alynady dep josparlanyp otyr.
Şyǧys Qazaqstan oblysy
Öskemende «Altai – türkı älemınıŋ altyn besıgı» atty halyqaralyq ǧylymi-praktikalyq konferensiia öttı. Äuelı qonaqtarǧa «Altyn adam» degen taqyryppen soŋǧy arheologiialyq qazbalardyŋ nätijelerı tanystyrylyp, Şyǧystyŋ kielı oryndary turaly körme ūsynyldy.
