Keşe Astana äkımı Äset İsekeşev Qazaqstannyŋ Europalyq biznes qauymdastyǧy ökılderımen kezdestı.
«Biyl – elordanyŋ 20 jyldyǧy. Europalyq käsıpkerlerdı ıskerlık, mädeni, sporttyq şaralarymyzǧa qatysuǧa şaqyramyn. 2-3 şıldede Jıbek joly qalalary merlerınıŋ forumyn ötkızemız. Oǧan 500 qalany şaqyrdyq, sonyŋ ışınde 100-den astamy keledı dep ümıttenemız. Atap aitsaq, Resei, Qytai jäne Ortalyq Aziia elderı, İran, Türkiia, Taiau Şyǧys qalalarynyŋ merlerı bar. Ekı kün boiy qalalardyŋ kölık, smart tehnologiialar, energiia tiımdılıgı, infraqūrylym, bılım beru baǧytyndaǧy damu täjıribesımen almasamyz. Ol jerde bız betpe-bet keletın syn-qaterlermen küresuge qatysty 20 taqyryp talqylanady. 4-5 şıldede Astana halyqaralyq qarjy ortalyǧynyŋ tūsaukeserı ötedı. Būl şaraǧa älemnıŋ är qiyrynan bankirler, investorlar, qarjygerler keledı» dep mälımdedı elorda äkımı.
Qala basşysy şeteldık käsıpkerlerge qala infraqūrylymyn damytu, smart tehnologiialardy engızu jönındegı josparlar turaly äŋgımeledı. Äset Örentaiūlynyŋ pıkırınşe, Astana halqynyŋ sany 2030 jyldan būryn 2 mln adamǧa jetedı. – Jaily qala salu mäselesı bır bölek, al halyqtyŋ ömır süru sapasyn arttyruǧa qyruar investisiialar saluymyz kerek. Ekınşı mındet – Astanany Dubai, Singapur sekıldı Euraziia keŋıstıgındegı jahandyq qala retınde damytu. Būl baǧytta qyzmet körsetu sektory, jaŋaşyl industriia, bılım beru, densaulyq saqtau, qarjy sektory, turizm, zamanaui öndırıs, innovasiia salalaryna arqa süieimız. Qazır IT-mamandardy daiarlauǧa erekşe köŋıl böludemız. Sızdermen yntymaqtastyq ornatuǧa daiynbyz, – dedı qala äkımı.
Qazaqstandaǧy Europa biznes qauymdastyǧy direktorlar keŋesınıŋ töraǧasy Audris Barsiavichus Äset İsekeşevtıŋ ünemı biznestıŋ qajettılıkterıne belsendı qoldau bıldıretınıne rizalyǧyn jetkızdı. Ol atalǧan qauymdastyqtyŋ elımızdegı 160 müşesınıŋ atynan şeteldık kompaniia basşylaryn Astana qalasyndaǧy investisiialyq jobalardy jüzege asyruǧa ündedı.
