Bız keşe «Astana-Kögaldandyru qūrylysy» AQ qyzmetkerlerımen bırge elorda köşelerıne gül otyrǧyzu jūmysyna qatysyp qaittyq.
Mamyr aiy tuysymen qala köşelerınıŋ jainap şyǧa keletın jyldaǧy ädetı bar. Elordanyŋ ışı-syrty qaly kılemdei qūlpyryp, gülordaǧa ainala bastaidy. Bırneşe jyldan berı Astana köşelerınıŋ ūzatylǧan qyzdyŋ jasauyndai jainap tūrǧanyna janar üiretıp aldyq. Körgen köz süisınedı. Samaladai şahardyŋ samal jelıne qyzyldy-jasyldy ösımdıkterdıŋ iısı qosylyp, saf auasyn syilauda. Ädemılıkke süisınu – zaŋdylyq. Desek te, sol sūlulyqtyŋ özı oŋai kelmeitının jäne aituymyz kerek. Astananyŋ sūlulyǧyn aidai älemge aişyqtap tūrǧan jasyl maisa men ösımdıkterdı ösırıp, baptaudyŋ öz maşaqaty jetkılıktı.
Basqasyn aitpaǧanda, olardy infeksiialyq aurudan bastap, basqa da ziiankesterden aman saqtau üşın jüzdegen adam köz ılmeidı. Tübımen topyraqqa otyrǧyzyp, olardyŋ güldegenın körmeiınşe damyl tappaidy. Oǧan baǧbandarmen bırge köşege gül otyrǧyzu jūmysyna barǧan kezde köz jetkızdık.
Mekemenıŋ 80-nen astam qyzmetkerı kün saiyn taŋǧy saǧat altydan bastap kögaldandyru jūmysyna kırısedı. Biylǧy jospar boiynşa baǧbandar qaladaǧy 151 127 şarşy metr aumaqty gülzarǧa ainaldyramyz dep otyr. Käsıporyn jylyjailarynda şyraigül, esınek, tagetis, salviia, begoniia syndy gülderdıŋ 54 türı ösırıldı. Kögaldandyru mamandarynyŋ aituynşa, biylǧy jyly būl gülderdıŋ qataryna gülderdıŋ jaŋa türlerı qosylypty. Atap aitsaq, olar – şyrmauyqgül, baqytgül, tegeurıngül, bozot, abrieta, geihera, pinesetum dep atalatyn köpjyldyq ösımdıkter.
Ädette, mamandar jyl saiyn gül otyrǧyzu nauqanyn mamyrda bastap, qala künıne sanauly kün qalǧanda aiaqtaityn. Biyl olar mausym aiynyŋ aiaǧyna deiın otyrǧyzyp bolamyz dep otyr. Būl mejege jetuge eş kedergı joq. Jersındırıletın gülder daiyn. Oǧan qosa qys kezınde käsıporynnyŋ landşaftyq jobalau şeberhanasynyŋ mamandary güldestelerdıŋ jobasyn äzırlep qoiǧan.
Bügınde «Aqorda», «Qazaq elı» alaŋdary men «Şabyt» şyǧarmaşylyq saraiy, «Studentter» saiabaǧy men qalalyq äkımdık, «Abai» eskertkışınıŋ aumaǧy kök maisamen kömkerıldı. Būǧan qosa, Astana köşelerı köpke gül müsındermen de belgılı. Jasyl jelekten jasalǧan 25 müsınnıŋ alǧaşqylary qoiyla bastady. Sol jaǧalaudaǧy gülden toqylǧan «Kiız üi», «Qyz ben jıgıt», «Tüieler» syndy müsınderdıŋ tamaşalauşylary tabyldy.
Ainūr ŞOŞAEVA
