Qazaqstan Respublikasynyŋ Memlekettık hatşysy Gülşara Äbdıqalyqova «Auǧanstandaǧy äielderdıŋ qūqyqtary men mümkındıkterın keŋeitu» atty öŋırlık konferensiiaǧa qatysty. Is-şara Auǧanstandy äleumettık-ekonomikalyq tūrǧydan qalpyna keltıru, öŋırlık beibıtşılıktı, tūraqtylyq pen qauıpsızdıktı nyǧaitu üşın Qazaqstannyŋ ūzaq merzımge arnalǧan järdemı aiasynda ūiymdastyryldy.
Aşylu räsımınde söz söilegen G.Äbdıqalyqova konferensiiaǧa qatysuşylarǧa Elbasy N.Nazarbaevtyŋ qūttyqtauyn oqyp berdı. Onda Qazaqstannyŋ Auǧanstanda beibıtşılıktı tezırek ornatuǧa kömektesudı jaqtaityny aitylǧan, sondai-aq äielderdıŋ jaǧdaiyn jaqsartu, genderlık teŋdıktı qamtamasyz etu jäne beibıt ömırge qol jetkızu jolyndaǧy Auǧan Ükımetınıŋ qadamdary joǧary baǧalanǧan.
G.Äbdıqalyqova Auǧanstandy Ortalyq Aziia elderımen ekonomikalyq bailanysqa tartudyŋ maŋyzdylyǧyn atap öttı. Osy oraida Memlekettık hatşy Auǧanstandaǧy jäne tūtas öŋırdegı naqty ekonomikalyq jobalardy jüzege asyru maqsatymen halyqaralyq biznes ökılderınıŋ keŋınen atsalysuy arqyly äielder käsıpkerlıgın damytudyŋ keşendı baǧdarlamasyn äzırleudı ūsyndy. Būl Auǧanstan äielderınıŋ äleumettık-ekonomikalyq mümkındıkterın keŋeite tüsedı.
Konferensiia qorytyndysy boiynşa Astana deklarasiiasy qabyldandy. Qūjatta Auǧanstandaǧy äielderdıŋ qūqyqtary men mümkındıkterın keŋeitu jäne jalpy Ortalyq Aziia elderınde negızgı genderlık ürdıstı ılgerıletu ısındegı öŋırlık özara ıs-ärekettıŋ baǧyttary aiqyndalǧan. Memlekettık hatşy konferensiia aiasynda Özbekstan Respublikasy Premer-ministrınıŋ orynbasary – Äielder komitetınıŋ töraiymy T.Narbaevamen, sondai-aq Auǧanstan delegasiiasynyŋ basşysy – Auǧanstan İslam Respublikasynyŋ Äielder ısterı jönındegı ministrı D.Nazarimen ekı jaqty kezdesuler ötkızdı. Kezdesuler barysynda Qazaqstannyŋ Özbekstanmen, Auǧanstanmen yntymaqtastyǧynyŋ qazırgı ahualy jäne perspektivalary talqylandy.
