Nūr-Sūltan qalasynyŋ polisiiasy özıne jüktelgen mındetterdı abyroimen atqaryp, bas şahardyŋ qoǧamdyq tärtıbın qamtamasyz etude kün demei, tün demei eŋbek etude.
Sonyŋ arqasynda jyl basynan berı qylmys jasau 5,5%-ǧa tömendedı. Sondai-aq esırtkı qylmystaryna qarsy küreste esırtkını satu, jarnamalau jäne elorda arqyly tasymaldau faktılerın anyqtauǧa da basty nazar audaryluda. Zaŋsyz ainalymnan 169 kg esırtkı, onyŋ ışınde 2,3 kg «geroin» alyndy. Esırtkı äzırleumen ainalysatyn üş zerthananyŋ qyzmetı toqtatylyp, 5 kg-dan astam «sintetika» tärkılendı.
Ükımettık emes ūiymdar men erıktılerdıŋ, sport mekemelerınıŋ qatysuymen 248 ret aldyn alu şaralary ötkızılıp, 40 esırtkı saity būǧattaldy. «Nūr-Sūltan – esırtkısız qala» 2022-2025 jyldarǧa arnalǧan jaŋa baǧdarlama äzırlendi.
Bügıngı taŋda qūqyq qorǧauşylar üşın qoǧammen özara ıs-qimyl, polisiia qyzmetınıŋ aşyqtyǧy, servistık modelge köşu mäselelerı özektı bolyp otyr.
Almaty jäne Saryarqa audany aumaǧynda «Qazaqstan polisiiasynyŋ servistık modelı» pilottyq jobasy jüzege asyryluda.
Qoǧamdyq oryndarda qyzmetkerlerdıŋ tūraqty qatysuyn qamtamasyz etu maqsatynda polisiia jūmysyna «Jūrtqa jaqyn polisei» qaǧidaty engızılude.
Ötken jyly qala boiynşa 10 moduldık stasionarlyq polisiia beketı ornatyldy. Uchaskelık polisiia punktınıŋ sany 27-den 41-ge köbeidı.
Polisiiany şūǧyl şaqyru jäne dabyl signalyn beru üşın adamdar köp jinalatyn oryndarda 13 «SOS» dabyl batyrmasy ornatyldy.
Memleket basşysy 2022 jyldy «Balalar jyly» dep belgıledı. Osyǧan bailanysty mektep äkımşılıgımen jäne ata-analar komitetterımen özara ıs-qimyl jūmystary qaita qaraldy.
1 qaŋtardan bastap mektep inspektorlary lauazymdary qysqartyldy. Endı iuvenaldyq polisiia qyzmetkerlerı mektepterde otyrmaidy, olar bekıtılgen uchaskelerde, onyŋ ışınde bılım beru mekemelerınıŋ aumaqtarynda aldyn alu jūmystaryn qamtamasyz etedı.
Keiıngı kezde qalada kölık qūraldaryn masaŋ küide jürgızu faktılerı aitarlyqtai alaŋdatady. Osy baǧyttaǧy jauaptylyqtyŋ küşeitılgenıne qaramastan, 1 892 mas jürgızuşı ūstalyp, kölık jürgızu qūqyǧynan aiyrylsa, 1 382 jürgızuşı äkımşılık qamauǧa alyndy. Jol-kölık oqiǧasyn jasaǧan 33 jürgızuşı qylmystyq jauapkerşılıkke tartyldy.
Jyl basynan berı azamattardy tūrǧylyqty jerlerı boiynşa tırkeu, azamattyq qarudy tırkeu, jeke kuälıkter men pasporttardy resımdeu siiaqty 1 mln 245 myŋ qyzmet türı körsetıldı.
Azamattarǧa yŋǧaily bolu üşın jäne sybailas jemqorlyq körınısterıne jol bermeu maqsatynda 91% qyzmet türı elektrondyq türge auystyrylǧan. Aldaǧy uaqytta jüienı 95%-ǧa deiın avtomattandyru josparlanyp otyr.
