Tūmanbai Moldaǧaliev – qazaq jyryndaǧy qaitalanbas qūbylys. Ol altyn qanatty köbelekter men ünı kökke köşetın būlbūldarǧa täntı edı, köktem kelse qūlpyryp sala beretın qyrdaǧy qyzǧaldaqtar men tynysyn ınju süigen tolqyndarǧa qūmar-tyn. Şiedei bop körıngen erınder men jyly şuaq tögılgen janarlardyŋ qūdıretıne basyn idı, solardy ömır boiy jyrǧa qosty. Sonau ≪Qyzyqsyŋ ǧoi, studenttık kezder-ai, synşylsyŋ ǧoi, möldır qara közder-ai!≫ dep jyrlaǧan studenttık şaǧynan bastap, qazaq lirikasynyŋ korifeiıne ainalǧanǧa deiın Tūmanbai aqyn özınıŋ adamdarǧa degen adal mahabbatynan ainyǧan joq. Aqyn adamdarǧa degen şeksız mahabbatyn jyr tılımen örnekteu üşın ömırge kelgendei edı. Ol qar astynan da japyraqtyŋ kübırlegenın aqyn jüregımen sezdı, köktemdı kütıp alu saltanatyna erekşe daiyndaldy. Onyŋ sezımı ömırdıŋ özındei şynaiy bolsa, mūŋy da aiauly edı. Qarapaiym edı. Aq taŋdaǧy appaq gülder men taŋǧy şyqtyŋ tamyp tüsken aŋsary aldymen Tūmanbai aqynnyŋ jüregınen ötıp, qalamyna ılıktı. Aspandy ärqily etıp ädıptegen altyn tüstes jūldyzdar şoǧyrynyŋ nūry aldymen aqynnyŋ janarynda tūrdy, tün jarymynan asyp küllı tırşılık qalyŋ ūiqyǧa ketkende Öleŋ ǧana köz ılmeitın. Ol bolaşaqpen mäŋgı jasaityn aqynnyŋ öleŋı edı. ≪Al adamdar külıp bastap ömırın, keterınde jylai da almai qalady≫ dep jyrlaǧan Tūmanbai aqyn da öttı dünieden. Qazaq jyrynyŋ Tūmanbaisyz qalǧanyna da jyl toldy. Bır kezderı jastyqtyŋ jyrşysy bolǧan aiauly jazuşy Mūqan İmanjanov dünieden ötkende Tūmanbai aqyn ≪Ūstazym men senı, keudeme jerledım≫ dep jyrlady. Tūmanbaidai tūnyq aqynyn qazaq halqy da keudesıne jerledı, ol ärdaiym halyq jadynda, qazaqpen bırge.
Hamit ESAMAN
