Keşe Nūr-Sūltan qalasy Qazaqstan halqy assambleiasynyŋ XX sessiiasy «Jaŋa Qazaqstan – azamattyq qoǧamy myqty tiımdı memleket» degen taqyrypta öttı. «Şabyt» Qazaq ūlttyq öner universitetınde ötken jiynǧa Nūr-Sūltan qalasy äkımınıŋ orynbasary, Nūr-Sūltan qalasy QHA töraǧasynyŋ orynbasary Berık Jäkenov töraǧalyq ettı. Sonymen qatar sessiiaǧa Parlament Mäjılısınıŋ jäne mäslihat deputattary, Prezident Äkımşılıgı, Aqparat jäne qoǧamdyq damu ministrlıgı, memlekettık organdar, elordalyq etnomädeni bırlestıkter, elordadaǧy QHA ǧylymi-saraptama toby, Qoǧamdyq kelısım keŋesı, Analar keŋesı jäne Jastar qanatynyŋ ökılderı qatysty.
Sessiia barysynda memlekettık tıldı damytu, patriottyq tärbie, memlekettık organdar men BAQ-tyŋ özara ıs-qimylyna qatysty mäseleler söz boldy. Qala damuyna qatysty biylǧy bırınşı jartyjyldyqtaǧy jūmystardy qorytyndylai kele, Nūr-Sūltan qalasy äkımınıŋ orynbasary Berık Jäkenov elordalyq QHA qyzmetınde oŋ dinamika baiqalǧanyn atap öttı. Onyŋ aituynşa, bas qalada soŋǧy üş jylda 5 jyldyq tūrǧyn üi qūrylysy jürgızılgenın alǧa tartqan ol sonyŋ nätijesınde 8,5 mln şarşy metr tūrǧyn üi paidalanuǧa berılgenın jetkızdı. Bügınde 3-JEO qūrylysy qaita jandanyp, jauyn-şaşyn suyna arnalǧan kärız jüiesı, sorǧy-süzgı stansasy salynyp jatyr, üş gaz qazandyǧynyŋ, kärız-tazartu qūrylǧylary men «Arai», «Jūldyz» jäne «Nauryz» ışkı elektr stansalarynyŋ jobalary jasaluda.
– 2019-2021 jyldary tūrǧyn alaptarda 25 köşege tasjol töseldı. 50 şaqyrymnan astam injenerlık jelı qūrylysy aiaqtalyp, memlekettık-jekemenşık ärıptestık esebımen salynǧan qūrylystardy qospaǧanda, 2 mektep, 2 sport keşenı aşyldy. Almaty men Saryarqa audandarynyŋ barlyq 10 tūrǧyn alaby tolyǧymen gazben qamtyldy. 680 şaqyrym gaz taratu jelılerı salyndy. Biyl Baiqoŋyr jäne Esıl audandaryn gazdandyru jūmystary jürgızılude. Soŋǧy üş jylda ūzyndyǧy 165 şaqyrym 300-den astam köşe salynyp, jöndeldı, ekı avtomobil köpırınıŋ qūrylysy jürgızılude, biyl Ūly Dala daŋǧyly boiyndaǧy köpır qūrylysy aiaqtalady. 500-ge juyq aula men 85 qoǧamdyq keŋıstık, skver, şaǧyn park pen balalar sport alaŋy abattandyryldy. Biyl taǧy 250 aula men 300 qoǧamdyq keŋıstık salyp, abattandyru josparlanǧan, – dedı B.Jäkenov. Ol sondai-aq elordanyŋ barlyq kommunaldyq memlekettık mekemelerı qyzmetkerlerınıŋ jalaqysy köterılgenın jetkızdı. Būl mädeniet nysandarynyŋ, muzeilerdıŋ, teatrlardyŋ, sonymen qatar äkımdık janyndaǧy Qoǧamdyq kelısım mekemesınıŋ qyzmetkerlerıne de qatysty.
QR Prezidentı Äkımşılıgınıŋ Qazaqstan halqy assambleiasy hatşylyǧy meŋgeruşısınıŋ orynbasary İndira Rystina QHA qyzmetınıŋ negızgı baǧytyna jäne Qazaqstan qoǧamynda tūraqtylyqty saqtauǧa baǧyttalǧan barlyq tetıkterdıŋ tiımdı jūmysy boiynşa QHA-nyŋ HHHI sessiiasynda Memleket basşysy qoiǧan mındetterdıŋ oryndaluyna erekşe nazar audaryp, sol tapsyrmalardy sapaly ärı uaqytyly oryndau öŋırlık assambleialardyŋ basty mındetı ekenın atap öttı.
«Tūran-Astana» universitetınıŋ kafedra meŋgeruşısı, dosent Vladimir Şnaider qazaqtyŋ mädenietı men ädebietı, tılı men salt-dästürın boiyna sıŋırıp, bükıl sanaly ömırın bılım salasyna, qazaq tılı men ädebietı mamandaryn daiarlau ısıne arnaǧanyn baiandady.
– 29 säuırde elordamyzda Memleket basşysy Qazaqstan halqy assambleiasynyŋ XXXI sessiiasynyŋ taqyrybyn «El bırlıgı – jaŋarǧan Qazaqstannyŋ tıregı» dep aluynyŋ da tereŋ mänı bar. Sol arqyly qazaq jerı, köpūltty qazaqstandyqtar üşın maŋyzdy ärı maǧynasy tereŋ tatulyq pen beibıtşılık tärızdı ruhani dünienıŋ qoǧamymyzdyŋ damuyna, «Jaŋa Qazaqstan» qūruda basty ūstanatyn prinsipımız bolyp tabylatyndyǧyna asa nazar audardy. Memleket basşysy «bırlık, tatulyq jäne beibıtşılık – bızdıŋ myzǧymas qūndylyqtarymyz» dedı. Onyŋ airyqşa maŋyzdy ekenın «Qaŋtar oqiǧalary» kezınde aiqyn sezındık. Qazır qaterlı künder artta qaldy. Sol kezde qandai qauıppen betpe-bet kelgenımızdı uaqyt ötken saiyn ūǧyna tüsemız. Şyn mänınde, bız memlekettılıgımızden aiyrylyp qala jazdadyq. Halqymyz «Qaŋtar qasıretınen» sabaq ala bıluı kerek. Endı ondai jaǧdai qaitalanbauy üşın qoldan kelgennıŋ bärın jasauǧa tiıspız» degen sözderı arqyly memlekettılıgımızdıŋ tıregı osy beibıt ömır men äraluyndy halqymyzdyŋ bırlıgı, ony ünemı nyǧaita tüsu kerek jäne soǧan bar küşımızdı jūmsauymyz qajet ekenın basa atap ötuınde ülken män bar, – dedı ol.
«Iýnchi» dūnǧen etnomädeni bırlestıgı töraǧasynyŋ orynbasary, «OSK-Stroiservis» JŞS bas direktory Daut Genhuzov aldaǧy uaqytta demokratiialyq bastamalar arqyly elımızdıŋ saiasi ömırınde oŋ özgerıster bolaryna senetının aitty.
– Memleket basşysy Qazaqstan halqy assambleiasynyŋ 31-sessiiasynda Konstitusiiaǧa özgerıster men tolyqtyrular engızu boiynşa referendum ötkızudı ūsynǧan bolatyn. Referendum öttı, halyq öz pıkırın bıldırdı. Endı Qazaqstan damyǧan jäne ädıl memleketke ainalaryna senımım mol. Onyŋ ärbır azamatyna bırdei mümkındık beretındıgıne öz ömırımdı mysal etıp, däleldei alamyn, – dedı ol söilegen sözınde.
Nūr-Sūltan qalasy QHA Analar keŋesıne üşınşı jyl jetekşılık etıp kele jatqan Altynai Täŋırbergenovanyŋ aituynşa, atalǧan keŋes elımızde azamattyq qoǧam belsendılıgın jandandyruǧa, memleket pen qoǧam arasyndaǧy sanaly jäne konstruktivtı serıktestıktı bastauǧa yqpal etken.
– Üş jyl boiyna bız köpbalaly jäne mümkındıgı şekteulı balalary bar analardy belsendı äleumettık ömırge tartu baǧytynda bırqatar jobany jüzege asyrdyq. «Ana-taim» jobasy aiasynda 120 äieldı käsıpkerlık negızderıne üirettık, sonyŋ arqasynda 63 äiel biznesın aşty. Ūlttyq mädenietımız ben tarihymyz arqyly ana tılıne degen qūrmettı arttyratyn «Qara şaŋyraq mektebı» jobasy Tılderdı damytu basqarmasymen bırge jüzege asyp jatyr. Qazırgı taŋda älemde bolyp jatqan jahandyq üderısterdıŋ qarqyny köz ılespestei jyldam. Balalarymyz aqparattyq qūraldarǧa köp köŋıl bölıp, virtualdy älemde ömır süredı. Mūndai jaǧdaida eŋ basty mäsele – ūlttyq bolmys pen mazmūndy saqtap qalu. Qazaqstan qoǧamynyŋ ruhani äleuetın köteru – bügınde özektı taqyryp, – dedı A.Mūratjanqyzy.
«Taŋ» tatar-başqūrt mädeni ortalyǧy töraǧasynyŋ orynbasary, Nūr-Sūltan qalasy QHA media-ortalyǧynyŋ basşysy Ravil Valeev atalǧan ortalyqtyŋ biylǧy bırınşı jartyjyldyqta üş otyrysy ötkenın jetkızdı.
– Elordadaǧy QHA-da 21 etnomädeni ortalyq bar. Olardyŋ ärqaisysynyŋ äleumettık jelıde paraqşalary jūmys ısteidı. Sol arqyly da bız ūlttar arasyndaǧy tatulyqty saqtap, etnostar arasynda arazdyq tumauyna nasihat jürgızemız. Bızder üşın Qazaqstannan basqa Otan joq jäne bolmaidy da. Bärımız bıluge tiıs maŋyzdy jait – osy. Bügınde bız konstitusiialyq referendumnan keiın jaŋa memlekettık ülgıge, memleket pen qoǧamnyŋ özara ıs-qimyly boiynşa jaŋa formatqa köşudemız. Qoǧamdaǧy senım men özara tüsınıstıktı nyǧaitu jäne pıkırlesu mädenietın qalyptastyru mūnyŋ bärı de halyqtyŋ igılıgı üşın qajet» dep atap öttı R.Valeev.
Sessiia barysynda Nūr-Sūltan qalasy QHA töraǧasynyŋ 2022-2023 jyldarǧa arnalǧan qoǧamdyq orynbasarlary sailandy. Būl qyzmetterge Jastar saraiynyŋ direktory, Qazaqstan halqy assambleiasynyŋ müşesı, Nūr-Sūltan qalasyndaǧy QHA keŋesınıŋ müşesı Sergei Solodovnikov jäne Korei etnomädeni bırlestıgı töraǧasynyŋ orynbasary Roza Pak laiyq dep tanyldy. Sessiia soŋynda elordalyq assambleia belsendılerı etnosaralyq kelısımdı nyǧaituǧa qosqan eleulı ülesı jäne elordanyŋ qoǧamdyq ömırıne belsendı qatysqany üşın alǧys hattarmen marapattaldy.
