Qazaqstan halyq partiiasynyŋ töraǧasy Aiqyn Qoŋyrov elımızde balalar arasyndaǧy qylmys pen qatygezdıktıŋ örşıp bara jatqanyna qoǧam nazaryn audardy. Ol «NeMolchi» qorynyŋ jetekşısı Dina Smaiylovanyŋ äleumettık jelıdegı jazbasyna qatysty özınıŋ oi-pıkırlerın jariialady.
Dina Qaraǧandy oblysynda 4-synyp oquşylarynyŋ 8 jastaǧy ūl balany zorlyqpen beiädep film köruge, balalardyŋ közınşe jynystyq qatynasqa mäjbürlegenı jönınde jazdy.
Aiqyn Qoŋyrov bır-bırıne aiausyz zorlyq körsetken balalardyŋ qylmysyn körıp, tūla boiyŋ tıtırkenetının, qarşadaiynan qatygezdıkke ūrynatyn balalardyŋ bolaşaǧyna alaŋdauşylyq bıldırdı. «Būl qylmysqa küdıktılerdıŋ jasy 11-de ǧana. Būlar älı jap-jas balalar ǧoi. Olardyŋ äreketı jasymen säikespeidı. Özıŋız oilaŋyzşy, 11 jasar balada qandai zorlyq, jäbırlık körsetu, qatygezdık boluy mümkın? Olar qai uaqytta qatygezdıkke boi ūryp jür? Kım kınälı? Ne ısteu kerek? Menıŋ oiymşa, mūndai saualdardyŋ jauabyn äuelı sol balanyŋ otbasynan, oqityn mektebınen, ömır süretın ortasynan ızdeu kerek» dep jazdy Aiqyn Qoŋyrov özınıŋ Facebook-tegı paraqşasynda.
Qazaqstan halyq partiiasy töraǧasynyŋ paiymdauynşa, bala – adamnyŋ bauyr etı, ömırınıŋ ainasy. Eger balanyŋ sanasy, jüregı qatygez bolsa, onda bızdıŋ qoǧam da sau emes degen söz! «Jasöspırım kezeŋ – būl adam ömırındegı eŋ maŋyzdy, özın-özı qalyptastyratyn, sanasy men zerdesı jetıletın şaǧy. Būl – bıreulerge elıkteitın kezeŋ. Al eger sol balanyŋ ösıp-öngen ortasynda, ūşqan ūiasynda bırdeŋe dūrys bolmasa, kınänı onyŋ ata-analary men tärbieleuşılerınen ızdeu kerek. Būl – öte kürdelı, kürmeuı qiyn mäsele» dedı A.Qoŋyrov.
