BASQARMA JŪMYSY BAIYPTALDY
Qazırgı taŋda elımızde memlekettık qyzmet körsetudıŋ sapasy men halyqqa qoljetımdılıgın arttyru asa özektı mäselelerdıŋ qataryna şyǧyp otyr. «Jaŋaru» sybailas jemqorlyqqa qarsy küres jalpyūlttyq qozǧalysy tıkelei būl baǧyttaǧy jūmystardy qadaǧalaityn bolady. Beisenbı künı osy qoǧamdyq bırlestıktıŋ mūryndyq boluymen Astana qalasy Säulet jäne qala qūrylysy basqarmasynyŋ qyzmetıne qatysty qoǧamdyq tyŋdaular öttı. Onda atalmyş basqarma basşysy Vitalii Sileskii mekemenıŋ jūmysy turaly baiandama jasady.
Onyŋ aituynşa, Säulet jäne qala qūrylysy basqarmasy tūrǧyndarǧa bes türlı memlekettık qyzmet körsetedı. Sonyŋ ışınde qalanyŋ köşelerı men oblystyq jäne audandyq maŋyzy bar avtokölık joldarynyŋ boiyna syrtqy (körnekı) jarnamany ornalastyruǧa rūqsat beru tärtıbı turaly egjei-tegjeilı baiandaǧan ol halyqtan köptegen sūraqtar osy mäsele boiynşa keletınıne nazar audardy.
Elordanyŋ kelbetıne körık qosatyn qūrylys nysandaryna toqtalǧan baiandamaşy «Myŋjyldyq» saiabaǧynyŋ maŋaiynda ornalasatyn jaŋa temır jol vokzaly audanynyŋ damu tūjyrymdamasy qaralyp, bekıtılgenın aityp öttı. Ol aumaqta, sondai-aq, kommersiialyq oryn-jailar, biznes-ortalyqtar, qonaq üiler, tūrmystyq qyzmet körsetu nysandarymen qatar tūrǧyn üiler de boi kötermek. Jalpy, Orynbor köşesınıŋ boiynda tūrǧyzylatyn nysandar bolaşaqta Astanamyzdy odan ärı ajarlandyra tüsedı.
Ärine, halyqty eŋ aldymen tūrǧyn üilerdıŋ qūrylysy mäselesı tolǧandyrady. Būl tūrǧydan alǧanda aldaǧy besjyldyqta elorda elımızdegı köşbasşy oryndy saqtap qalatynyna sendırdı Vitalii Sileskii. «Astanada tūrǧyn üi qūrylysyna 823 jer telımı bölıngen. Sonyŋ ışındegı 121 jer telımıne biudjettık nysandar salynady, al 702 nysandy kommersiialyq ūiymdar igeredı. Atalǧan aumaqtarda 15,8 million şarşy metr tūrǧyn üi ornalasady dep boljanuda» degen basqarma basşysy bas josparǧa säikes 2030 jylǧa qarai bas qalanyŋ tūrǧyn üi qory 37,2 million şarşy metrge, al tūrǧyndar sany 1 million 220 myŋ adamǧa jetedı dep boljanyp otyrǧanyn mälımdedı.
Qoǧamdyq tyŋdauǧa «Jaŋaru» sybailas jemqorlyqqa qarsy küres jalpyūlttyq qozǧalysy» respublikalyq qoǧamdyq bırlestıgınıŋ töraǧasy Oralbai Äbdıkärımov qatysyp, baiandamaşyǧa sūraqtardy qoidy. Būl ūiym qalalyq Säulet jäne qala qūrylysy basqarmasynyŋ byltyrǧy jäne aǧymdaǧy jartyjyldyq jūmysyna taldau jasaǧan eken. Onyŋ qorytyndylaryn qoǧamdyq bırlestıktıŋ Astana qalalyq filialy direktorynyŋ orynbasary Esenjan Dosanov jariia ettı. Äsırese, basqarma memlekettık qyzmet körsetudı oryndau merzımı mäselesıne kelgende sylbyr qimyldaityny aityldy. Jūmys qarqyny men deŋgeiıne mekemege bölıngen bölme sany da kerı äser etıp otyr eken. Mäselen, 30 qyzmetkerge ekı-aq kabinet berılgen. Oǧan jauap bergen Vitalii Sileskii bügıngı taŋda mekemenıŋ 500 qyzmetkerı qalanyŋ är būryşynda ornalasqan ǧimarattarda otyruǧa mäjbür bolyp jatqany, aldaǧy uaqytta Säulet jäne qala qūrylysy basqarmasyna jaŋa ǧimarat salynatynyn aitty.
Otyrys qorytyndysynda «Jaŋaru» sybailas jemqorlyqqa qarsy küres jalpyūlttyq qozǧalysynyŋ tarapynan basqarmaǧa bırneşe ūsynys aitylyp, qoǧamdyq bırlestıktıŋ Astana qalalyq filialynyŋ direktory Däuletkerei Rahmetullin jyl soŋyna deiın ūiym taǧy alty ret osyndai qoǧamdyq tyŋdau ūiymdastyrudy josparlaǧanyn jetkızdı.
Amanǧali ŞMİTŪLY