– Bügın saiasilanǧan qoǧamda ömır sürıp jatyrmyz. Halyq elde bolyp jatqan jaǧdailardy nazardan tys qaldyrmai, barlyq saiasi üderısterdı baqylauda ūstap otyr. Tüsınbeitın mäseleler bolsa, olardyŋ jauabyn memlekettık qyzmetkerlerdıŋ auzynan estısek deidı. Būl öte dūrys ta, jaqsy. Osyndai jaǧdaida şeneunıkterdıŋ aşyq bolǧany öte qajet. Olar adamdarmen dialog qūra bıluı tiıs.
Qazaqstan Prezidentı Qasym-Jomart Toqaev özınıŋ alǧaşqy Joldauynda bilık pen qoǧam arasynda tūraqty dialog ornatu arqyly ǧana qazırgı geosaiasi ahualǧa beiımdelgen üilesımdı memleket qalyptastyruǧa bolatynyn atap öttı. Azamattardyŋ barlyq syndarly ötınış-tılekterın jedel ärı tiımdı qarastyratyn «Halyq ünıne qūlaq asatyn memleket» tūjyrymdamasyn ıske asyrudy bärımızge ortaq mındet etıp qoidy. Al ol üşın kabinetterde tyǧylyp otyrmai, halyq arasyna şyǧyp, elmen äŋgımelesıp, qajettı aqparatty jetkıze bılu kerek.
«Jabyq kabinetterdıŋ» uaqyty öttı. Qazırgı zamanda memlekettık organdar basymdyqty aşyqtyq pen halyqtyŋ mūŋ-mūqtajdyqtaryn şeşu üşın jedel äreketke beru kerek. Būl tūrǧydan Memleket basşysy aşyqtyq arqyly jergılıktı bilık organdary jūmysynyŋ tiımdılıgın arttyru turaly öte dūrys aitty.
Eldegı özektı mäselelerdı, är adamnyŋ problemalaryn Prezident qana şeşpeidı, ol üşın elımızde ärtürlı ministrlıkter, departamentter men vedomstvolar jūmys ısteidı. Bıraq şeneunıkter «qūlaǧynyŋ bıtelıp qalǧany» sonşa, keide qarapaiym basşydan ünıŋdı Prezidentke jetkızu oŋaiyraq siiaqty körınedı.
Bügınderı belgılı bır lauazymdy qyzmettı atqaru azdyq etedı. Ärtürlı jaǧdailar men oqiǧalarǧa pıkırıŋdı batyl aityp, halyqtyŋ problemalarynan ırgenı aulaq salmai, tuyndaǧan mäselelerdı şeşuge tyrysu kerek. Är memlekettık qyzmetkerdıŋ basty mındetı – osy. Är şeneunık halqy men memleketınıŋ güldenuıne qyzmet ıstep otyrǧanyn tüsınuı kerek.
