Bılım mäselesı – basty taqyryp
Saryarqa audanynyŋ äkımı Eset Baiken audan aumaǧyndaǧy bılım beru ūiymdary basşylarymen kezdestı. Qazır atalmyş audanda 33 orta mektep pen 31 balabaqşa jūmys ısteidı.
Äkımnıŋ aituynşa, bügıngı taŋda özektı mäselelerdıŋ bırı – balalardyŋ oqu oryndaryndaǧy qauıpsızdıgı. Kezdesude bılım beru nysandarynyŋ qauıpsızdıgı mäselelerı talqylandy.
«Oqu ornynyŋ qauıpsızdık jüiesı böten adamdardyŋ kıruınen qorǧau, beinekameralarmen, turnikettermen, dabyl tüimelerımen jabdyqtaluy tiıs. Özderıŋız bıletındei, mektepterdegı küzet qyzmetın vahterler atqarady. Olardyŋ köbısı – zeinet jasyndaǧy adamdar. Jalaqynyŋ azdyǧyn körıp, jas ärı qabılettı er-azamattar būl lauazymǧa barudan bas tartady» dedı E.Baiken.
Jiynda audannyŋ Polisiia basqarmasy men qalalyq Bılım basqarmasyna mekteptegı küzet jüiesın retke keltırıp, tiımdı ortaq şeşımdı şūǧyl türde qolǧa alu ūsynyldy. Sondai-aq mektepterdıŋ ainalasynda jol-kölık infraqūrylymynyŋ qauıpsızdıgı, baǧdarşamdar men jol belgılerın ornatu, jaryqtandyru siiaqty mäseleler qataŋ baqylauǧa alynatyny aityldy.
Jinalys barysynda köterılgen taǧy bır mäsele – mektepterdegı bala sanynyŋ tyǧyzdylyǧy.
«Elordada halyqtyŋ qarqyndy ösuın eskere otyryp, oqytudyŋ üş auysymdyq rejimıne jol bermeu maqsatynda jaŋa mektepter salu qajet. Aldaǧy 3 jylǧa arnalǧan mektepterdıŋ qūrylys josparyn qabyldadyq. Josparda «BINOM SCHOOL» täjıribesı boiynşa qazırgı zaman talaptaryna sai mektepterdıŋ de qūrylysy eskerılgen» dedı audan äkımı.
Kezdesuge qalalyq basqarmalar men Statistika departamentınıŋ ökılderı qatysty. Olarmen bırqatar problemalyq mäselelerdı şeşu joldary men halyq sanaǧy barysy talqylandy. Bır aita keterlıgı, Saryarqa audanyndaǧy mektepter men balabaqşalardyŋ barlyq qyzmetkerı halyq sanaǧynan öttı.