«Suret söileidı» degen ras. Äitpese, osydan 17 jyl būryn tüsken myna fotokeskın bolmasa, däl sol kez, sol şaq aina-qatesız oiymyzǧa tüser me edı?! Auyzekı äŋgımede jady jaqsy bıreu eske salsa, mümkın. Sonda da bır jerı kemşın tüsıp tūrady ǧoi. Al, surettıŋ aty – suret. Osy ala jeide kigen azamattardyŋ suretı jaŋa myŋjyldyq qarsaŋyndaǧy basqan ızderımızdı taiǧa taŋba basqandai körsetıp, saǧynyşty sätterdı köz aldymyzda kölbeŋdetedı.
Ol kez jaŋa astanaǧa jan-jaqtan jūrttyŋ aǧylyp, köpten körıspegenderdıŋ joǧalǧan asylyn tapqandai qauyşyp, masattanyp, masairaǧan tūsy edı. «Künde jiyn, künde toi». Būl qospa joq, ras söz. Memlekettık organdar bırınen soŋ bırı baspasöz mäslihattaryn ötkızıp, arty merekege ūlasyp ketıp jatatyn şaq. Keibır jomart bastyqtar qyzdy-qyzdymen sol jerde-aq kezdesudı keşke meiramhanada jalǧastyruǧa pärmen berıp te jıberedı. Myna suret sondai furşettıŋ bırın eske tüsırıp otyr. Qala äkımşılıgı jas elordanyŋ qym-quyt tırşılıgı jaiynda Astana künıne orai brifing ötkızbek bolǧan. Ony ūiymdastyruşy sol kezdegı äkımnıŋ baspasöz hatşysy, belgılı publisist-jurnalist, auzynan sözı, qolynan ısı kelıp tūrǧan azamat Sädıbek Tügel redaksiialarǧa habarlap ta qoiǧan. Qalanyŋ töl basylymy bolǧasyn ış tarta basşymyz belgılı qalamger Jūmagül Sauhatqa «mümkındık bolsa, jurnalisterdıŋ bärın jıberseŋız» degen ötınış aitady. Ol senbı künı edı. Aldyn ala belgılenıp qoiǧan futboldan BAQ arasyndaǧy dästürlı turnir ötpekşı edı. «Astana aqşamy» komandasy soǧan daiyndalyp jatqan. Odan qaluǧa bolmaidy. Äkımdıktegı jiynǧa ortamyzdan Temırhan Ramazanovty jıberıp, özımız qalalyq ortalyq saiabaqtaǧy futbol alaŋqaiyna bettedık. Turnir marapaty bar, oiyny bar, 6-7 saǧatqa sozyldy. Kün besınnen auǧanda Temırhan Asqar Qūmarbaidy stadionǧa jügırtıp jıberıptı. Jas aiyrmasyna qaramastan Temırhanmen qatty qaljyŋdasatyn Asqar:
– Temırhan aǧam äkımşılıkke tez jetıŋder. Säkeŋ jıgıtterdı şaqyrtyp jatyr. Al, men dastarhandy «ūstap» otyrmyn dedı, – deidı entıgıp. Olai bolsa jinalyp, bara qoiyŋdar jıgıtter! – dedı komandany jarysqa özı bastap şyqqan Bas redaktordyŋ bırınşı orynbasary Janbolat Aupbaev.
– Bärı bıttı ǧoi. Bäigege basynan-aiaq qatystyq. Menıŋ tämamdaityn jūmystarym bar, – dep ädetınşe bırdeŋenı ūmytqan adamdai jan-jaǧyn tügendei qarap şalbarynyŋ balaǧyn qaǧa, qolyn ysqylap, şaşyn sipai redaksiiaǧa bet aldy.
Bız bolsaq sporttyq formamyzdy qoltyqtap äkımşılıkke qarai jöŋkıldık. Onda Sädıbek jasatyp, Temırhan küzetken dastarhan jaiylyp tūr edı. Qoltyǧymyzǧa qysqan sporttyq kiım bızge qalai kelıp edı özı? Osy suret ony da eske tüsırdı. Bır künı apyr-topyr boldyq ta qaldyq. Bastyqtyŋ pärmenı qūlaǧyna tise «atqa mınıp alatyn» esepşı Külmira qaryndasymyz:
– Eşqaisysyŋ ketıp qalmaŋdar, ekıde Nūrlan Nyǧmatulin keledı. Bırıŋ qalmai osynda bolyŋdar! – dep nyǧyrlap kettı.
Bıreumen kezdesuın josparlap qoiǧan keibıreuler «Kezdesuım bar edı, barmasam ūiat bolady, bastyqqa özıŋ tüsındırıp aitarsyŋ» dep habarşy qyzdyŋ aldyn kes-kesteidı.
Äkım orynbasarymen ūjymnyŋ kezdesuı jaimaşuaq jaǧdaida öttı. Sol kezde qalalyq BAQ-qa baqylau jasaityn Nūrlan Zairollaūly äŋgımenı bırden ūjymnyŋ, jurnalisterdıŋ mūŋ-mūqtajymen tanysudan bastady. Azdaǧan kırıspe sözden soŋ äŋgıme äleumettık-tūrmystyq jaǧdaiǧa oiysty. Üi mäselesı özektı edı. Osy äŋgımenıŋ nätijesınde gazettıŋ jauapty hatşysy Erǧazy Äsembekov baspanaly bolyp, toilaǧanymyz este. Osy Erekeŋ ūjymnyŋ täp-täuır futbol komandasy bar ekenın tısınen şyǧarǧany sol edı, atoilai türegelgen sportqa beiım Ǧalym Qojabekov «BAQ arasyndaǧy sporttyq jarystarǧa qatysatyndai laiyqty bırkelkı formamen qamtyluǧa äkımşılık yqpal etse» degen oiyn bıldırdı. Äkım orynbasary jaqynda qala delegasiiasy BAE-na baratynyn, onyŋ qūramynda käsıpkerler baryn, sonyŋ bıreuıne tapsyratynyn aityp, bır ai ışınde komandanyŋ formaly bolatynyna sendırıp kettı. Solai boldy da! «Astana aqşamy» gazetınıŋ futbolşylary osylaişa arab jeidesımen alaŋǧa şyǧyp jürdı. Mynau – komandamyz. Jer-jerden jiylǧan «mamliukter» (J.Aupbaev osylai atady) uaiymy joq, tırlıkterı alşysynan tūrǧandai mektep aulalaryndaǧy futbol alaŋdaryndaǧy jattyǧudan qalmaidy-aq. Ol da bır däuren eken. «Airandai ūiyǧan» ūjymnyŋ şyraiyn şyǧarǧan sol jıgıtter bügınde är jerde käsıp qyluda. Elıne kerı qaityp ketkenderı de bar. Sol baiaǧy qu tırlıktıŋ qamy ǧoi…
Aitqadyr Tıleuov,
jurnalist
