BIREGEILER ANYQTALATYN BIRINŞILIK

Astanada üstel tennisınen Qazaqstan Respublikasynyŋ chempionaty ötıp jatyr. Bıregeilerdı anyqtaityn bırınşılıkke elımızdıŋ 16 öŋırınen 112 sportşy qatysyp jatyr. Osy saiystyŋ nätijesınen keiın ūlttyq qūrama jasaqtalmaq.

Elordada ötıp jatqan el chempionaty 11 nauryz künı bastaldy. Tur­nirdıŋ alǧaşqy künınde äielder ara­syndaǧy komandalyq kezdesuler öttı.
– Būl chempionat Astana qa­la­syn­da alǧaş ret ūiymdas­tyrylyp tūr. Būqaralyq sportqa basa män be­re­tın bızdıŋ qalamyz üşın būl turnir – ülken mereke. Bırınşılıkke Astana qalasynyŋ 20 tennisşısı qaty­suda. Onyŋ teŋ jartysy erler bolsa, jartysy – qyzdar. Barlyǧy – bız­dıŋ mekteptıŋ tülekterı men tär­bielenuşılerı. Astanalyqtardyŋ ışınde Kirill Gerasimenkony erekşe atap ötuge bolady. Ol – sport şeberı, bırneşe dürkın Qazaqstan chempiony, QR Spartakiadasynyŋ jeŋımpazy, sondai-aq, Rio Olimpiadasynyŋ qa­tysuşysy. Bolaşaǧynan mol ümıt küttı­retın sportşylardyŋ qataryn­da Malika Sandybaeva da bar. Qalǧan jastarymyzdy da osal deuge bolmaidy. Olardyŋ osyndai ülken saiysqa qatysuynyŋ özı märtebe, täjıribe bolmaq, – dedı №9 Balalar men jasös­pırımder sport mektebınıŋ direktory Aidyn Toqbaev.
Chempionatta erler jäne äielder arasynda komandalyq kezdesuler, jūptyq saiystar jäne jeke razriad­taǧy saiystar ötedı. Sondai-aq, būl turnirde jıgıtter men qyzdar jaǧy özara bölınıp baq synamai, jūptyq jarysta aralasyp ta synǧa tüsedı.
Nauryzdyŋ 16-syna deiın jal­ǧa­satyn bırınşılıkte äzırge äiel­der arasyndaǧy ko­man­dalyq saiys jeŋım­paz­dary anyqtaldy. Būl synda Qara­ǧan­dynyŋ qyzdary taǧy da chempion atandy. Taǧy da deuı­mızdıŋ sebebı bar. Būlar byl­tyrǧy saiysta da altynnan alqa taqqan. Olar jartylai finalda Batys Qazaqstan obly­synyŋ komandasyn jeŋıp, finalǧa şyqty. Aqtyq syndaǧy qarsylasy Almaty komandasy būǧan deiın pav­lodarlyqtardy jolda qaldyrdy.
Sonymen, finalda Qara­ǧan­dy oblysy almaty­lyqtardy 5:0 esebımen tıze büktırdı. Komandanyŋ sapynda Natalia Sladkova, Iýliia Gas, Zäureş Aqaşeva, Margarita Harechko jäne Aleksandra Smirnova oinady. Al Almatynyŋ qorjynyna kümıs medal salǧan qyzdar – Valentina Uspanova, Aiia Älımbaeva, Anel Bahyt, Elena Beisenova jäne Dina Janädılova.
– Saiys öte joǧary deŋgeide ötıp jatyr. Jan-jaqtan jinalǧan sportşylar jeterlık. Olardyŋ ışınde talai jarysta aldyŋǧy qatardan körınıp jürgen sportşylar da bar. Osy sport türıne den qoiǧanyma bügınde 24 jyl bolypty. Arasynda azdap üzılıs alyp, demalǧan kezım de boldy. Osynau jyldardyŋ ışınde Qazaqstan ūlttyq qūramasynyŋ sapynda universiadanyŋ jeŋımpazy boldym. Bırınşılıktıŋ sättı ötuıne tılektespın, – dedı elordalyq tennisşı Äliia Janpeiısova.
Bügın jeke razriadtaǧy aldyn ala oiyndar jalǧasady. Al erteŋ jūptyq jarystar bastalmaq.

Orynbek ÖTEMŪRAT