Aqpan aiynda Astana qalasynda Qoǧamdyq keŋes qūrylǧan bolatyn. Osyǧan orai, bız jaŋa konsultativtı organnyŋ basşysy Sansyzbai Esılovke jolyǧyp, jaŋa qūrylymnyŋ jūmysy jönınde äŋgımelestık.
– Sansyzbai Seiıtjanūly, aldymen qaladaǧy Qoǧamdyq keŋestıŋ maqsaty men mındetterıne toqtalsaŋyz.
– Ötken jyly 2 qaraşada şyqqan «Qoǧamdyq keŋester turaly» zaŋ 2016 jyldyŋ 1 qaŋtarynan bastap küşıne endı. Būl – Memleket basşysynyŋ bes instituttyq reformany ıske asyru jönındegı Ūlt jospary – «100 naqty qadam» baǧdarlamasyn oryndau boiynşa atqarylatyn jūmystardyŋ zaŋdy jalǧasy. Osy Zaŋ boiynşa jergılıktı oryndar men oblystarda, Astana jäne Almaty qalalarynda, sondai-aq ortalyq ministrlıkterdıŋ qūramynda qoǧamdyq keŋester qūrylyp, ötken aptada qalalyq mäslihattyŋ 64-sessiiasynda Astanadaǧy Qoǧamdyq keŋestıŋ qūramy bekıtıldı. Ol 25 adamnan tūrady.
Jalpy, jergılıktı özın-özı basqaru mümkındıkterın keŋeitu maqsatynda qūrylǧan keŋes negızgınen konsultativtık-keŋestık baqylau organy bolyp tabylady. Demek, äkımdık pen mäslihattyŋ qabyldap jatqan normativtık qūjattary aldymen osy keŋeste qaralyp, maqūldanǧannan keiın ǧana Ädılet departamentınde bekıtıledı. Mäselen, bizneske bailanysty normativtık qūjattar Käsıpkerler palatasy ökılderınıŋ qatysuymen ötetın keŋes otyrysynda qaralyp, maqūldanady.
Qoǧamdyq keŋestı qūrǧan kezde zaŋ boiynşa bükıl prosedurasyn būljytpai oryndauǧa tyrystyq. Äuelı qalalyq gazetter men özımızdıŋ saitqa osyndai keŋestıŋ qūrylatyny jönınde habarlandyru jariialanyp, 9 adamnan tūratyn jūmys toby qūryldy. Būl rette qaladaǧy saiasi partiialar men ükımettık emes ūiymdar öz ūsynystaryn bıldırdı. Solardyŋ arasynda özderı-özderın ūsynǧandar da boldy. Osylaişa, barlyǧy 61 kandidattyŋ ışınen jūmys toby konkurs jüiesınde 25 adamdy sailady. Olardyŋ 30 paiyzy jergılıktı äkımdıkte, mäslihatta, basqa da organdarda ūsynylǧan azamattar bolsa, qalǧan on segız adam osy Astanada tırkeuden ötken saiasi partiialar men qoǧamdyq bırlestıkterdıŋ, ükımettık emes ūiymdardyŋ ökılderı. Olar dauysqa salu arqyly sailandy.
– Qoǧamdyq keŋestıŋ bırınşı otyrysynda aşyq dauys beru arqyly Sızdıŋ töraǧa bolyp sailanǧanyŋyzdan habardarmyz. Al, qoǧamdyq keŋestıŋ qūramynda kımder bar?
– Qoǧamdyq keŋes müşelerınıŋ barlyǧy derlık Astananyŋ damuyna üles qosqan, jerlesterımızdıŋ qūrmetıne bölengen azamattar. Olardyŋ arasynda Astana qalasy äkımınıŋ orynbasary Ermek Amanşaev, S.Seifullin mūrajaiynyŋ direktory Nesıpbek Aitov, «Qazaqstan qala qūrylysy odaǧy» astanalyq filialynyŋ atqaruşy direktory Gülnär Qūsaiynova, Qazaq ūlttyq öner universitetınıŋ rektory Aiman Mūsaqojaeva, «Jaina Astana» qoǧamdyq bırlestıgınıŋ töraǧasy Mūhtar Erketaev, Astana Ūlttyq käsıpkerler palatasynyŋ direktory Ǧani Tasmaǧanbetov jäne Ekonomika jäne biudjettık josparlau basqarmasynyŋ basşysy Janat Nūrpeiısov sekıldı Astananyŋ qalyptasuyna airyqşa üles qosqan jalpy sany 25 azamat bar. Jūmys toby keŋestıŋ töraǧasy etıp menı sailady. Būl rette menıŋ bükıl ömırbaianym bas qalamen, Aqmola oblysymen bailanysty ekenı, Astana qalasy äkımınıŋ bırınşı orynbasary bolyp jūmys ıstegenım, Qazaqstan Respublikasy Parlamentı Mäjılısınıŋ deputaty bolyp sailanǧanym eskerıldı. Osy otyrysta Qoǧamdyq keŋes hatşysy lauazymyna qalalyq mäslihat apparatynyŋ basşysy Vera Pyteva sailandy.
Sonymen bırge Qoǧamdyq keŋes komissiiasynyŋ jūmysyn üilestıretın, ūiymdastyratyn jäne aqparattyq qoldaudy qamtamasyz etetın töralqa qūramy bekıtıldı.
Menıŋşe, eŋ bastysy Qoǧamdyq keŋes jergılıktı özın-özı basqaru jüiesınde tiıstı ornyn taba bılgenı jön. Sebebı, ol biudjet jobasyn, onyŋ atqaryluy turaly eseptı, qalanyŋ damu josparyn qarastyratyn, atqaruşy jäne ökılettı organdar engızetın normativtık qūqyqtyq aktıler boiynşa qorytyndy beretın bolady.
– Aldaǧy josparlaryŋyz qandai?
– Alǧaşqy otyrysymyz öttı, töralqa müşelerı sailandy. Endı Qoǧamdyq keŋestıŋ erejesı daiyndaluda. Ükımet belgılegen erejenı özımızge qajettı kölemınde bekıtkennen keiın jūmysymyzdy josparlaimyz. Ol üş aiǧa, jarty jylǧa jäne bır jylǧa baǧyttalyp jasalady. Sony bekıtkennen keiın jūmysymyzdy bastaimyz. Jaqyn künderde qala äkımdıgınen tüsken qūjattardy qūptau üşın ekınşı otyrysymyzdy ötkızbekpız.
Qoǧamdyq keŋester jūmysynyŋ negızgı nysany osyndai otyrystar bolyp tabylady. Qajet bolǧan jaǧdailarda qoǧamdyq keŋestıŋ otyrysyna onyŋ şeşımımen memlekettık organdardyŋ, būqaralyq aqparat qūraldarynyŋ, ǧylymi, käsıptık jäne basqa da ūiymdardyŋ ökılderı, sondai-aq sarapşylar men özge de mamandar şaqyryluy mümkın. Keŋestıŋ jūmysy bekıtılgen josparyna säikes, tūraqty türde jüzege asyrylady.
Jalpy, būl – öte jauapty jūmys. Jergılıktı atqaruşy organdardyŋ jūmysyn jetıldırude Qoǧamdyq keŋes halyq pen bilık arasyn jaqyndastyruǧa yqpal etetın bolady. Sondyqtan bızdıŋ maqsatymyz köpşılık köŋılınen şyǧyp, äkımdık pen mäslihatpen bırlesıp, qoǧam üşın, halyq üşın jūmys ısteu. Būl keŋes elımızde demokratiiany damytudaǧy maŋyzdy qadam der edım. Ol jariialylyq, ūstanymynda jūmys ıstep, halyq pen atqaruşy bilık arasyn jaqyndata tüsedı degen senımdemın.
G. ÖKEŞQYZY, astana-akshamy.kz
