«Han Şatyr» oiyn-sauyq ortalyǧynda «Bala – ömırdıŋ gülı» atty şara öttı. Jasotandyqtar būl merekenı «Baqytty balalyq» partiialyq jobasynyŋ aiasynda ūiymdastyrǧan. Basty maqsat – balalar üiınıŋ tärbielenuşılerı men ata-ananyŋ qamqorlyǧynsyz qalǧan büldırşınderge köterıŋkı köŋıl-küi syilau.
Alǧaşynda ainalaǧa tosyrqai qaraǧan balaqailardyŋ jüzu basseinıne kelgende ūiqylary şaidai aşyldy. Ulap-şulap kelıp, suǧa kümp bergen balalardyŋ äreketın syrttai baqylau da adamǧa erekşe äser syilaidy eken. Janymda tūrǧan «Jas Otannyŋ» ūiymdastyru bölımınıŋ qyzmetkerı Sūluşaş Düisenbekova «bügın osy ortalyqqa 7 men 14 jas aralyǧyndaǧy 50 balany alyp keldık. Älgınde avtobusta än salǧanymyzda, köŋılsızdeu otyrǧan edı. Kördıŋız be, qazır bärınıŋ jüzı bal-būl janyp jür! Būl balalardyŋ ömırge kele sala körgen qiynşylyqtary az emes qoi. Sondyqtan, qolymyzdan kelgenşe quanyş syilaǧymyz keledı» deidı sybyrlap. Sūluşaştyŋ aituynşa, partiianyŋ jūmys jospary boiynşa jyl saiyn balalarǧa arnalǧan 50-den astam merekelık ıs-şara ötedı eken.
– Menıŋ myna qalpaǧymdy kördıŋız be?
Jalt qaradym. Alua esımdı büldırşın qyz özınıŋ ädemı kiımımen maqtanǧysy kelgendei maǧan qarai jüzıp keledı eken. «Sen menen de jaqsy jüzedı ekensıŋ» dedım külıp. Qompaŋdap qaldy. Taǧy da maqtai tüssın dedı me, mūrnyn basyp, bırşama uaqyt sudyŋ astynda tūrdy. Balanyŋ bal qylyǧy qandai jarasymdy!
Balalar jaǧajaida demalǧan soŋ, «Fame City» ortalyǧynda attraksiondarǧa otyryp, köŋıl köterdı. Köpşılıgı biyl jastary tolmaǧandyqtan, lagerge bara almai qalǧan eken. «Jas Otandyqtar» osy olqylyqtyŋ ornyn toltyruǧa tyrysyp, balaqailardyŋ bır künın merekege ainaldyrdy.
Bır aita keterlıgı, «Jas Otannyŋ» balalarǧa arnalǧan qaiyrymdylyq şarasy «Han Şatyrda» bırınşı ret ötkızılıp otyr. Ūiymdastyruşylar «merekelerde, jalpy, jyldyŋ barlyq mezgılınde büldırşınderdı nazarymyzdan tys qaldyrǧan emespız. Äleumettık jaǧdaiy tömen otbasylardyŋ balalary men mümkındıgı şekteulı balalarǧa da jiı baryp tūramyz» deidı.
Roza SEKSENBAIQYZY
