Astanada dästürlı «Būrqasyn-2015» şaŋǧy festivalı öttı. Ūly Jeŋıstıŋ 70 jyldyǧyna, Qazaq handyǧynyŋ 550 jyldyǧyna, Qazaqstan halqy Assambleiasynyŋ jäne Qazaqstan Respublikasy Konstitusiiasynyŋ 20 jyldyǧyna orailastyrylyp ötkızılgen būqaralyq sport şarasyna 3000-nan astam astanalyqtar men qala meimandary qatysty. Dästürlı şaranyŋ aşylu räsımınde Mäjılıs deputaty, general-leitenant Abai Tasbolatov, QR Mädeniet jäne sport ministrlıgı Sport komitetınıŋ töraǧasy Elsiiar Qanaǧatov jäne Astana qalasy Turizm, dene tärbiesı jäne sport basqarmasynyŋ basşysy Berık Marjyqbaev barlyq qatysuşylardy sport merekesımen qūttyqtap, jarys jolyna şyqqan ärbır qatysuşyǧa zor densaulyq jäne sättılık tıledı. Aşyq aspan astynda Qazaqstan änūrany şaryqtap, lek-legımen jarystar bastaldy.
Esıl özenı üstındegı şaŋǧy joldary, mūz aidynyndaǧy şaŋǧy jarystary men hokkei oiynyna, aq qardaǧy alaŋqailarda ötken baluandar beldesuı men kır tasyn köteru saiystaryna, aşyq aspan astynda oiyqtan balyq aulau jäne arqan tartys bäsekelerıne mektep oquşylary, joǧary oqu oryndary oqytuşylary men studentterı, ministrlıkter men vedomstvolar, qalalyq memlekettık qūrylymdar men käsıporyndar qyzmetkerlerı, äskeriler men qoǧamdyq ūiymdardyŋ ökılderı, sondai-aq, qala qonaqtary qatysty. Osy rette, bır aiqyndap aitarymyz, «Būrqasyn» – būl, elordamyzdaǧy otbasylyq jäne korporativtık demalystyŋ üzdık türlerınıŋ bırıne ainalyp otyrǧan būqaralyq şara. Biyl 13-ret ötkızıldı.
Qystyŋ soŋǧy künınde ötken merekelık şara halyqtyŋ köŋıl-küiın taŋerteŋnen biıkke kötergendei boldy. Turizm, dene tärbiesı jäne sport basqarmasy mamandary daiyndaǧan saltanatty sahna, aqşaŋqan kiız üi, köterılgen qazan, tamaqtanu aulasy – bärı-bärı qainaǧan tırşılıktıŋ körınısın köz aldyŋa äkeledı.
Kün säulesımen şaǧylysqan aq qardaǧy ızdıŋ üstıne tüsken alǧaşqy şaŋǧyşylar da jarys jolyna şyqty. Köpşılıktıŋ qoşemetıne kenelgen būl bäsekede märe syzyǧyn bırınşı bolyp Parlament deputaty, general-leitenant Abai Tasbolatov kestı. Nikolai Driutov bastaǧan Astana qalasy sportynyŋ ardagerlerı de şaŋǧy jarysynda jeŋıske degen jıgerımen jastarǧa önege körsettı.
– Bügın – Astana üşın öte jaqsy kün. Elordamyzdyŋ äkımdıgı men qalalyq Turizm, dene tärbiesı jäne sport basqarmasynyŋ ūiymdastyruymen ötıp jatqan şaŋǧy merekesı öte paidaly şara bolyp otyr. Özım jyl saiyn qatysamyn. Biylǧy merekelık jarystarǧa üş myŋǧa juyq adam qatysyp jatyr degendı estıp quanyp tūrmyn. Zeinetkerler de bar eken, jastar köp eken. Adamnyŋ densaulyǧyn şyŋdaityn ärı qalanyŋ tırşılıgın türlendıretın osyndai şaralar köbırek bolsa eken dep tıleimın. Mūndai jarysta jeŋıletınder bolmaidy dep oilaimyn. Öitkenı, qatysuşylardyŋ bärı de köterıŋkı köŋıl-küige bölenedı, sergek jüredı. Basty bailyqty osylai kütuımız kerek, – dep aǧynan jaryldy merekelık şarany aşqan ärı alǧaşqy jarysynda top jarǧan Abai Tasbolatov myrza.
Jarys baǧdarlamasyna säikes erler, äielder, jıgıtter, qyzdar, balalar, zeinetkerler jäne mümkındıgı şekteulı jandar arasyndaǧy jarystar ötkızıldı. Dästürlı şaŋǧy jarysynyŋ jeŋımpazdary diplomdar men estelık syilyqtarǧa ie boldy.
– «Būrqasyn» festivalı öte jaqsy öttı. Menıŋ jasym 70-ten asyp ketken. Degenmen, bügın osy merekelık jarystarǧa qatystym. Jan-jaǧyma qarasam, barlyq adamdardyŋ jüzderınen quanyş körınedı. Balalar da, jastar da köp eken. Būl da quanyşty jaǧdai. Osylar ǧoi elımızdıŋ bolaşaǧy. Sondyqtan olardyŋ salauatty ömırge jaqyn bolǧanyn qalaimyn. Denderı sau, baqytty bolsa eken dep tıleimın. Şaŋǧy festivalın osyndai qyzyqty etıp ötkızıp jatqan qalalyq Turizm, dene tärbiesı jäne sport basqarmasyna rizaşylyǧymdy bıldırgım keledı. Astanamyzda osyndai igı şaralar jiı ötıp tūrsa degen tılegım de bar, – dedı merekege özımen bırge nemerelerın erte kelgen sport ardagerı Aisūltan Jaqypbekov aǧamyz.
Sonymen, Astana törınde qysty şyǧaryp, köktemdı qarsy alǧan, köpşılıktıŋ köŋılın kötergen dästürlı «Būrqasyn» merekelık şaŋǧy festivalı de öz märesıne jettı.
