Şymkent qalasynda ötken bokstan Qazaqstan chempionaty öz märesıne jettı. On künge sozylǧan bäsekenıŋ on salmaq boiynşa chempiondary men jüldegerlerı belgılı boldy.
Tartysty ötken dodada osy şyŋdy būryn da baǧyndyrǧan bırqatar boksşy özderın taǧy da bır däleldep, öz biıkterınen körındı. Sondai-aq düldülderdıŋ arasynan osy uaqytqa deiın aty şyqpaǧan boksşylar da tanyldy.
Sonymen el bırınşılıgınde 49 kelı salmaqta aqmolalyq Temırtas Jüsıpov altynnan alqa taǧyp, osymen törtınşı ret chempion atandy. Ol būl ataqqa 2013, 2014 jäne 2016 jyldary qol jetkızgen.
Al 52 kelıde Oljas Bainiiazovtyŋ baǧy jandy. Oŋtüstık Qazaqstan örenı chempion retınde alǧaş ret töbe körsettı.
56 kelıde – astanalyq Iliias Süleimenov, 60 kelıde maŋǧystaulyq Berık Äbdırahmanov jeŋımpaz boldy. Būl ekeuı de osymen ekı dürkın el chempiony atandy.
Oŋtüstıktıŋ taǧy bır oǧlany Bekdäulet İbragimov 64 kelıde üzdık boldy.
Qazaqtyŋ salmaǧy atanyp ketken 69 kelıde būryn esımı erekşelenbegen jambyldyq Aslanbek Şymbergenov qara üzdı.
Oŋtüstıktıŋ qorjynyna olja salǧan üşınşı boksşynyŋ esımı – Abai Töleş. Ol 75 kelıde jūdyryqtasty.
81 kelı men 91 kelıde el namysyn älemdık deŋgeide qorǧap jürgen Ädılbek Niiazymbetov pen Anton Pinchuk alǧa ozdy. Ädılbektıŋ qarsylasy jaraqatyna bailanysty aqtyq saiysqa şyǧa almai, kümıstı mıse tūtty.
Al asa auyr salmaqta jaŋa chempion paida boldy. Ötken jylǧy chempion Oljas Būqaevty finalda qapy qaldyryp, jambyldyq Nūrsūltan Amanjolovtyŋ mereiı üstem boldy.
Jalpy komandalyq esepte OQO boksşylary köş bastady. Olardyŋ enşısınde – 3 altyn, 2 kümıs, 3 qola jülde. Ekınşı orynǧa 2 altyn, 3 kümıs, 2 qolamen Maŋǧystau oblysy köterıldı. Üzdık üştıktı tüiındegen jambyldyqtar 2 altyn, 1 kümıs medal ielendı.
Būl bäsekede Astana qalasy qūramasynyŋ da nätijesı jaman bolǧan joq. Basynda elordalyq Iliias Süleimenovtıŋ ekınşı ret chempion bolǧanyn atap öttık. Oǧan qosa, 69 kelıde Qanaǧat Maralov kümıs jüldeger atansa, 91+ kelıde Nūrbolat Sermahanov qolaǧa qol jetkızdı.
Orynbek ÖTEMŪRAT
