Qazır elımızde Qazaqstan Prezidentınıŋ halyqqa arnaǧan Joldauynyŋ mänı men maŋyzyn är mekeme, är käsıporyn kündelıktı ömırde basşylyqqa alyp, onyŋ baǧyt-baǧdarynan tuyndaityn şeşımderdı jüzege asyruda. «Ädılettı Qazaqstanyŋ ekonomikalyq baǧdary» atty biylǧy qyrküiek aiyndaǧy Memleket basşysynyŋ Joldauy ärdaiym el damuynyŋ basym baǧyttary men aldaǧy maqsat-mındetterdı aiqyndap beruımen qūndy.
Elımız bügınde ekonomikalyq saiasattyŋ jaŋa ülgılerın qalyptastyra bastady. Auyldyq jerlerdegı halyqtyŋ tūrmys-tırşılıgınıŋ jaqsaruyna da basa nazar audaryluda. 2020 jyldan berı mūǧalımderdıŋ jalaqysy ekı ese östı. Halyqqa zeinetaqy jinaǧynyŋ bır bölıgın paidalanuǧa mümkındık berıldı. Mūnyŋ özı zor qoldau bolǧanyn köpşılık äleumettık jelıler men būqaralyq aqparat qūraldarynda aityp, jazyp, rizalyǧyn bıldırude. Rasynda da, osy jobanyŋ igılıgın körıp, elde milliondaǧan adam tūrǧyn üi mäselesın şeşıp, baspanaly boldy.
Taǧy bır aita keterlıgı, Joldauda būǧan deiın Memleket basşysynyŋ bastamasymen qolǧa alynǧan «Ūlttyq qor – balalarǧa» jobasynyŋ jandana tüsuı. Endı sonyŋ arqasynda aldaǧy jaŋa jyldan bastap el aumaǧyndaǧy 18 jasqa deiıngı barlyq balanyŋ esepşotyna qarajat tüse bastaidy. Prezidenttıŋ el erteŋı – jas örender üşın mūndai igı qadamǧa baruy asa qūptarlyq.
Sondai-aq Joldauda aitylǧany – 2024 jyldyŋ 1 qaŋtarynan bastap eŋ tömengı jalaqynyŋ 85 myŋ teŋgege köterıluı. Ärine, būl töŋırekte ärtürlı pıkır aitylyp qalyp jatyr. Aqşa qai uaqytta da köp bolmaidy. Qanşa alsaŋyz da azdyq etedı. Sondyqtan onyŋ berekesı men igılıgın köretın de qarapaiym eŋbek adamdary boluy kerek.
Keiıngı kezde Qazaqstandy IT memleketke ainaldyru bızdıŋ eŋ basty strategiialyq mındetımız bolyp otyr. Ärine, sifrlandyru ısınde bırşama jetıstıkke de qol jetkızdık. Alaida qolda barǧa qanaǧattanbai, bız elektrondy ükımettı jäne fintehtı damytu indeksı boiynşa älem köşbasşylarymen iyq teŋestırudemız. Byltyrdan berı IT salasyndaǧy eksportymyz bes ese ösıptı. Osyǧan bailanysty Memleket basşysy Joldauda bylai dedı:
«Ükımet jasandy intellektını damytu ısıne basa nazar audaruǧa tiıs. Älemde aldaǧy bırneşe jylda osy salaǧa bır trillion dollardan astam investisiia salynady degen boljam bar. Jasandy intellekt ony damyta bılgen elderdıŋ ışkı jalpy önımıne aitarlyqtai üles qosuy mümkın.
Jasandy intellektınıŋ mümkındıgın tolyq paidalansaq, bılım ekonomikasyna tyŋ serpın beremız. Jetekşı halyqaralyq kompaniialarmen yntymaqtastyq ornatu kerek. Bılıktı mamandar daiarlauymyz qajet. Kemınde üş belgılı joǧary oqu orny jasandy intellekt salasyna qajettı kadr daiarlaumen jäne zertteuler jürgızumen ainalysuy kerek.
Elımız esepteu quattaryn jahandyq tūtynuşylarǧa satatyn orynǧa ainala alady. Sondyqtan ırı mälımet ortalyqtaryn saluǧa investisiia tartu üşın türlı jeŋıldıkterdı de qamti otyryp, barynşa qolaily jaǧdai jasau kerek. Sondai-aq mälımettı saqtau jäne öŋdeu salasynda Qazaqstannyŋ müddesın ılgerıletu qajet».
Joldauda jan-jaqty tūjyrymdalǧan būl mäseleler aldaǧy uaqytta da elde biznestı damytuǧa, sifrlandyrudy jetıldıruge, ǧylym men tehnologiiany damytuǧa zaŋnamalyq tūrǧydan tyŋ serpın bererı sözsız.
Altynşaş Tabuldina,
Astana qalasy mäslihatynyŋ deputaty
