ELBASY AQŞ PREZİDENTIN QŪTTYQTADY
Nūrsūltan Nazarbaev Donald Trampqa Amerika Qūrama Ştattarynyŋ 45-şı Prezidentı bolyp sailanuyna bailanysty qūttyqtau jedelhatyn joldady, dep habarlady QR Prezidentınıŋ baspasöz qyzmetı.
Memleket basşysy Qazaqstan halqynyŋ jäne jeke özınıŋ atynan D.Trampty qūttyqtap, biyl elderımız arasynda diplomatiialyq qarym-qatynas ornaǧanyna 25 jyl tolatynyn atap öttı.
«Sızdıŋ basşylyǧyŋyzben Amerika Qūrama Ştattary dünie jüzınde tūraqtylyqty, qauıpsızdıktı saqtau jäne ösıp-örkendeu jolynda tırek bolyp qala beretınıne senımdımın», – delıngen jedelhatta.
Elbasy Qazaqstannyŋ 2017-2018 jyldarda BŪŪ Qauıpsızdık keŋesıne tūraqty emes müşe boluy ärıptestıgımızdıŋ maŋyzdy kezeŋıne ainalatynyna senım bıldırdı.
«Bız Keŋes jūmysyna eleulı üles qosyp, AQŞ-pen barlyq özektı mäseleler boiynşa özara tiımdı ıs-qimyl jasauǧa äzırmız», – delıngen jedelhatta.
Soŋynda Nūrsūltan Nazarbaev Donald Trampqa tabys tılep, ony Qazaqstanǧa saparmen keluge şaqyrdy.