PUTİN MEN TRAMP KEZDESTI
Keşe Finliandiia astanasy – Helsinkide Mäskeu uaqytymen saǧat 14-ten öte AQŞ jäne Resei prezidentterınıŋ kezdesulerı bastaldy.
Jüzdesu aldynda Donald Tramp pen Vladimir Putin bır-bırıne qysqaşa söz arnady. Aq üidıŋ qojaiyny sol jerde Kreml basşysyn futboldan älem chempionatyn jaqsy ötkızuımen jäne Resei qūramasynyŋ ondaǧy tabysymen qūttyqtady.
Būdan ärı ekı prezident äŋgımenı Siriia töŋıregınde qordalanyp qalǧan mäselelerge qarai būryp, «Soltüstık tasqyn-2» jobasyn jüzege asyru jaiyna, sondai-aq, AQŞ pen Resei arasyndaǧy qarym-qatynastyŋ keleşegıne arnady.
Ekı liderdıŋ audarmaşylardyŋ qatysuymen ötken köp qyrly, keŋ auqymdy taqyrypty bırınşı jeke kezdesulerınen keiın äŋgımege Resei syrtqy ıster ministrı Sergei Lavrov pen AQŞ memlekettık hatşysy Maikl Pompeo qosyldy.
Bız kezdesudıŋ qorytyndysy turaly kelesı joly keŋınen äŋgımelep beremız.
KUBA JEKE MENŞIKKE JOL AŞADY
Kubanyŋ jaŋa konstitusiiasy elde jeke menşıktık qūqyqty moiyndaityn bolady.
Bilıktıŋ resmi basylymy – Granma gazetınıŋ jazuyna qaraǧanda, endı kez kelgen memleket basşysynyŋ qyzmetı 5 jyldyq ekı merzımnen tūryp, 10 jyldan aspaidy. Būdan bölek, respublikada prezident jäne vise-prezident lauazymy engızıledı. Būǧan deiın mūnda memleket basşysy qūzyretın memlekettık keŋes pen ministrler keŋesınıŋ töraǧasy atqaryp kelgen edı. Qazır ol oryntaqta biylǧy säuırde Raul Kastrony almastyrǧan Migel Dias-Kanel otyr.
Konstitusiia mätını bırınşı ret genderlık belgı boiynşa quǧynǧa ūşyratuǧa tyiym salady, jeke menşık qūqyǧyn moiyndaidy. Atalǧan qūjatqa 21-23 şılde künderı ötetın el parlamentı – halyq bilıgı ūlttyq assambleiasynyŋ otyrysynda dauys berıledı. Sodan keiın parlament özgertken nūsqa halyqtyq referendumǧa ūsynylady.
AQŞ REZERVTEGI MŪNAIǦA QOL SALMAQŞY
AQŞ strategiialyq zapasta saqtalǧan mūnaiyn rynokqa şūǧyl şyǧaru jaiyn qarastyryp jatyr.
The Wall Street Journal basylymynyŋ jazuynşa, AQŞ prezidentınıŋ äkımşılıgı mūny mūnaidyŋ baǧasy kürt köterılıp ketuıne jol bermeu üşın jasap jatqanǧa ūqsaidy. Vaşington, sonymen bırge, mūnai rynoktaryndaǧy joǧary sūranysty saqtap qalu üşın basqa elderdı de kömırtegı önımderın öndırudı ūlǧaituǧa şaqyryp jatqan körınedı.
Mausym aiynyŋ basynda Saud Arabiiasy men Resei OPEK elderıne mūnai öndırudı sötkesıne 1,5 mln barrel deŋgeiıne deiın jetkızudı ūsynǧan edı. Taraptar ony Venesuelada mūnai öndırudıŋ tüsıp ketuımen jäne AQŞ-tyŋ sanksiiasyna orai İran mūnaiy bır bölıgınıŋ rynoktan ketu yqtimaldylyǧymen tüsındırdı. Bıraq mūndai jospar İran, Venesuela jäne İrak elderın qanaǧattandyrǧan joq. Mūnai öndırudı şekteu jönındegı kelısım 2017 jyldan berı jūmys ıstep keledı. Oǧan OPEK-tıŋ 24 elı qosylǧan bolatyn.
