El Täuelsızdıgınıŋ 30 jyldyǧynda elordamyzda boi kötergen nysanaly eskertkışterımızdıŋ sany eluden asypty. Älı de qazaq jūrtynyŋ, onyŋ keŋ-baitaq jerınıŋ azattyǧy üşın janyn bergen ūlyq ūldarymyz ben tūǧyryna qondyratyn tūlǧalarymyz barşylyq.
Osy jyldary halqymyzdyŋ ūlt-azattyq qozǧalysyna qatysty tarihymyzdy jadymyzda jaŋǧyrttyq. «Jyl ötken saiyn Alaştyŋ abyroiy asqaqtap, bedelı biıktei beredı. Olardyŋ atqarǧan ısı eşqaşan maŋyzyn joǧaltpaidy. Sebebı ūlt müddesı, el qamy degen ūǧymdar – mäŋgı qūndylyqtar» dedı Qasym-Jomart Toqaev eskertkıştıŋ aşu saltanatynda. Alaşorda ükımetın basqarǧan memleket qairatkerı Älihan, ūlt ūstazy Ahmet, ūlt bırlıgıne bastap «Oian, qazaq» dep ūran tastaǧan Mırjaqyp elorda törınde tas müsın bolyp qaita bas qosty.
Osydan on jyl būryn müsınşı Nūrlan Dalbai men säuletşı Şot-Aman Uälihanovtyŋ şyǧarmaşylyq şabytynan tuyndaǧan, qoladan qūiǧan som müsın, Kenesarynyŋ ör beinesı Esıldıŋ ekı betın jaǧalai qonǧan eldıŋ eŋsesın köterıp tūrǧandai.
Hannyŋ joly aşylǧannan keiın el basyna kün tuǧanda at auyzdyqpen su ışıp, er etıgımen su keşken zamandarda eldık atyna kır keltırmegen, ot şainap, şoq tükırgen bahadür batyrlarymyzdy bas şaharymyzǧa jinadyq dese bolǧandai. Alty Alaştyŋ bas sardary, «qazaqtyŋ qamal qorǧany», ırgedegı Ereimennıŋ topyraǧynan jaralǧan Qanjyǧaly qart Bögenbai batyr, qazaqtyŋ bırtuar perzentterı Bauyrjan Momyşūly, Raqymjan Qoşqarbaev, Talǧat Bigeldinov, Jaqsylyq Üşkempırov, Äliia men Mänşüktei arularymyzdyŋ el esınde qalǧan esımımen bırge şaharymyzdaǧy tas tūlǧasy da köz quanyşymyz, maqtanyşymyz.
Mäŋgılık eldıgımızdıŋ qasiettı belgılerı – «Otan-ana» monumentı, «Mäŋgılık el» saltanat qaqpasyna qosa «Qazaq elı» monumentımen tüiındeledı.
Qazaq – ejelden eldıktıŋ jolynan jaŋylmaǧan el. Onyŋ belgısındei bolyp Türkiianyŋ tūŋǧyş prezidentı Mūstafa Kemal Atatürık, orys ädebietınıŋ negızın saluşy, ūly aqyn ärı jazuşy Aleksandr Puşkin, fransuz qolbasşysy Şarl de Goll men Rumyniia ädebietınıŋ klassigı Mihai Eminesku müsınderı halyqtar arasyndaǧy dostyqtyŋ belgısındei bolyp qalmaq. Osy eskertkışterdıŋ arasynda «Qazaq elıne myŋ alǧys!» monumentı de bar. Būl da el tarihynyŋ bır kezeŋınen syr şertedı.
Bas qalamyzdyŋ basty eskertkışterı tek körık berıp qana qoimai, elımızdıŋ ötkenınen syr şertıp, qala tūrǧyndarynyŋ qazaq tarihyn jasaǧan tūlǧalaryna degen qūrmetındei asqaqtai bermek.
Aigül
UAISOVA
