Qazaq önerı keŋıstıgınen özınıŋ ornyn oiyp tūryp alǧan astanalyq «Jastar» teatrynyŋ qos mereitoiy biyl qatar keldı. Ruhaniiat ordasynyŋ qūrylǧanyna 15 jyl tolsa, teatrdyŋ negızın qalaǧan reformator rejisser, Qazaqstannyŋ eŋbek sıŋırgen qairatkerı, Abai atyndaǧy Memlekettık syilyqtyŋ laureaty Nūrqanat Jaqypbai mereilı jetpıs bes jastyŋ belesıne şyqty. Osyǧan orai atalmyş teatrda mereitoilyq keş ūiymdastyryldy. Sonyŋ barysynda rejisserdıŋ şyǧarmaşylyǧy jaily «Qiialdan qiianǧa samǧaǧan bır pendeŋ…» kıtabynyŋ tanystyrylymy, ǧylymi konferensiia jäne U.Şekspirdıŋ «Romeo-Juletta» tragediiasynyŋ premerasy öttı.
Öner oşaǧy men rejisserdıŋ mereitoiyna orai köptegen qūttyqtaular men jyly lebızder aityldy. Parlament Senatynyŋ töraǧasy Mäulen Äşımbaevtyŋ qūttyqtauyn senator Nūrtöre Jüsıp, Astana qalasy äkımınıŋ mındetın atqaruşy Altai Kölgınovtıŋ qūttyqtauyn onyŋ orynbasary Eset Baiken, qalalyq mäslihat hatşysy Erlan Kanalimovtyŋ lebızın mäslihat deputaty Erlan Däkenov oqyp berdı. Sonymen qatar Mädeniet jäne sport ministrı Däuren Abaev pen bırqatar oblys basşylary, el aimaqtaryndaǧy teatrlar, T.Jürgenov atyndaǧy Qazaq ūlttyq öner akademiiasy, Roza Baǧlanova atyndaǧy «Qazaqkonsert» memlekettık konserttık ūiymy atynan qūttyqtaular oqyldy.
– «Jastar» teatry – eŋselı elordamyzdyŋ aq saraiy, san qyrly, jasampaz öner ordalarynyŋ bırı. Elordamyzdyŋ mädeniet salasynyŋ damuynda özderıŋız syndy bılıktı mamandardyŋ qajyrly eŋbegı jatyr. 15 jyl ışınde köptegen qoiylym qoiyp, elımızdıŋ atyn şetelderde tanytyp jürsızder. Mınsız qyzmetterıŋız üşın alǧys aitamyn.
Qūrmettı Nūrqanat Jaqypbai! Sızdı 75 jas mereitoiyŋyzben şyn jürekten qūttyqtaimyn! Jyldar boiy mol täjıribeŋızben, käsıbi bılıktılıgıŋızdıŋ arqasynda elımızdıŋ mädeniet salasynyŋ örkendeuıne sübelı üles qosyp kelesız. Ömır jolyŋyz jas ūrpaqqa ülgı-önege. Tolaiym şyǧarmaşylyq tabys tılei otyra, aldaǧy uaqytta da örelı önerıŋızdı halyq igılıgı jolynda jūmsai beruıŋızge tılektespın, – delıngen Astana äkımınıŋ mındetın atqaruşy Altai Kölgınovtıŋ qūttyqtauynda.
Osydan 15 jyl būryn elordada «Jastar» teatrynyŋ qūryluyna, onyŋ körkemdık jetekşılıgıne Nūrqanat Jaqypbaidyŋ taǧaiyndaluyna Astana qalasynyŋ äkımdıgı, sol kezdegı qala äkımınıŋ orynbasary Ermek Amanşaev ūiytqy boldy. Ermek Ämırhanūly teatrdyŋ qūrylu tarihyn, körnektı rejisserdıŋ keluın eske aldy.
– Astana jastar qalasy bolǧannan keiın bızdıŋ aldymyzda jastar teatryn aşu maqsaty tūrdy. Sol kezde menıŋ oiyma eŋ aldymen, Nūrqanat Jaqypbai tüstı. Almatyda jürgen edım, bırden sol kısıge zvondadym. Ol Astanaǧa jiyrma bes şäkırtımen keldı. Būl – elordamyzdyŋ endı qalyptasyp kele jatqan kezı. Bırden bärıne jaǧdai jasau mümkın bolǧan joq. Degenmen, «Jastar» saraiynan oryn berdık. Keiınnen Beibıtşılık jäne kelısım saraiynda, Oquşylar saraiynda bıraz otyrdy. Qalibek Quanyşbaev teatrynyŋ sahnasynda spektaklderın qoiyp jürdı. Bırte-bırte maqtan tūtar teatrymyzǧa ainaldy. Astananyŋ «Jastar» teatry – bügıngı taŋda elımızdegı eŋ bedeldı, eŋ ataqty, şyǧarmaşylyq äleuetı, jetken jetıstıkterı jaǧynan aldyŋǧy qatarly teatr, – dedı Ermek Amanşaev.
Jurnalist, teatrtanuşy Nazerke Jūmabaidyŋ «Qiialdan qiianǧa samǧaǧan bır pendeŋ…» kıtabynyŋ tanystyrylymyn belgılı aqyn, Memlekettık syilyqtyŋ laureaty Nūrlan Orazalin men «Jastar» teatrynyŋ direktory, Qazaqstannyŋ eŋbek sıŋırgen qairatkerı, Memlekettık syilyqtyŋ iegerı Ädıl Ahmetov jürgızdı. Kıtaptyŋ tūsauyn memleket jäne qoǧam qairatkerı Quanyş Sūltanov pen belgılı ǧalym, filologiia ǧylymdarynyŋ doktory, professor Ädıl Ahmetov kesıp, jyly lebızderın jetkızdı. Qyrǧyz Respublikasynyŋ eŋbek sıŋırgen qairatkerı, Ūlttyq televiziiasynyŋ direktory Qairat İmanäliev «Jastar» teatry men Nūrqanat Jaqypbaidyŋ önerı Qyrǧyzstanda joǧary baǧalanatynyn, jazda elderıne arnaiy şaqyryp, teatr men rejisserdı mereitoilarymen qūttyqtaǧandaryn, qyrǧyzdyŋ mädeniet jäne qoǧam qairatkerlerı atynan Nūrqanat Jaqypbaiǧa Qazaqstannyŋ Eŋbek Erı ataǧyn beru üşın Qazaqstan Prezidentıne hat joldaǧandaryn aitty.
Mäjılıs deputaty Amanjol Ältai Nūrqanat Jaqypbaidy mereitoiymen qūttyqtap, astyna at mıngızdı, iyǧyna şapan japty. Astanadaǧy Muzykalyq jas körermen teatrynyŋ direktory, Qazaqstannyŋ eŋbek sıŋırgen qairatkerı, Phd doktory Ashat Maemirov Nūrqanat Jaqypbaidyŋ şyǧarmaşylyǧy jaiynda mazmūndy baiandama jasady. «Jastar» teatrynyŋ alǧaşqy direktory, Qazaqstannyŋ eŋbek sıŋırgen qairatkerı Ǧani Qūljanovqa, teatrdyŋ būrynǧy direktorlary Aibolat Janǧaliūly men Ernar Jūmataevqa qūrmet körsetıldı.
Qazaqstannyŋ halyq jazuşysy, Memlekettık syilyqtyŋ iegerı, Qazaqstannyŋ Eŋbek Erı Äbış Kekılbaev audarǧan «Romeo men Djuletta» tragediiasy Nūrqanat Jaqypbaidyŋ qoltaŋbasynda erekşe bolyp şyqty. Uiliam Şekspirdıŋ şyǧarmasy bolǧanymen, rejisser spektakldı ūltymyzǧa neǧūrlym jaqyndatqan. Būl «Romeo-Juletta» deitın atauynan, keiıpkerlerdıŋ kiımderınen, Jandäulet Batai somdaǧan Pıradar atty keiıpkerdıŋ qosyluynan körındı. Qoiylym muzykasy da şyǧys sarynynda boldy. Spektaklge sirk elementterı de qosyldy. Keş osy tragediianyŋ premerasymen tüiındeldı.
