Elımızde eludı eŋserıp, alpysty alqymdaǧandardyŋ jūmysqa ornalasuda bıraz qiyndyqqa tap bolatyndary jasyryn emes. Osy mäselenıŋ töŋıregınde būrnaǧy künı «Qazaqstan 2050» Jalpyūlttyq qozǧalysy Mädeniet jäne sport ministrlıgınıŋ qoldauymen «50-den keiın: zeinet aldyndaǧy adamnyŋ jūmysqa ornalasuda tap bolatyn qiyndyqtary» taqyrybynda döŋgelek üstel ötkızdı. Jiynǧa Densaulyq saqtau jäne äleumettık damu ministrlıgı, Astana äkımdıgı men ükımettık emes ūiym ökılderı, HR salasyndaǧy mamandar, sondai-aq, kadrlyq agenttıkter basşylary qatysty.
QR Konstitusiiasynyŋ 24-bap, 2- tarmaǧynda eŋbek üşın aqy tölengende qandai da bır kemsıtuşılıktıŋ bolmauy tiıs delıngen. Soǧan qaramastan, qoǧamda jūmysqa ornalasu barysynda bırqatar diskriminasiiaǧa jol berılıp jatyr. Mūndai kedergılermen, äsırese, zeinetkerlık jasqa taqap qalǧan adamdar ūşyrasady. Jūmysynan aiyrylyp, şarasyz küide qalǧan qarttarmen salystyrǧanda, jastar būl mäselede tez jol tauyp, beiımdelıp kete alady. Jastar arasyndaǧy jūmyssyzdyqpen küreske baǧyttalǧan baǧdarlamalar – olarǧa memleket tarapynan körsetılıp jatqan qoldaudyŋ bır dälelı. Al, zeinetkerlıkke taqap qalǧan azamattar nazardan tys qalyp qoiyp otyr. Olar az da bolsa tabys közınen aiyrylyp qalmau üşın jūmystaǧy keibır qolaisyzdyqtarǧa kelısuge mäjbür ekenı de şyndyq.
«Bügınde eŋbekke jaramdy 8,5 mln qazaqstandyq bar. Al olardyŋ törtten bırın 45 pen 59 jas aralyǧyndaǧy azamattar qūraidy eken. Sondyqtan da olardyŋ bılımın jetıldıretın arnaiy oqu baǧdarlamasy qajet» deidı ūiymdastyruşylar. Sonymen qatar, kezdesude talqyǧa tüsken ūsynystardyŋ barlyǧy tiıstı qūzyrly organdarǧa jıberıletındıgı aityldy.
Al «Qazaqstan 2050» jalpyūlttyq qozǧalysy keŋesınıŋ töraǧasy Danat Jūmin «Jol kartasy» baǧdarlamasy boiynşa jas şamasyna qaramastan ärbır azamat qaita daiarlyq kursynan öte alatyndyǧyn mälımdedı. Ol üşın bar bolǧany «Jūmyspen qamtu ortalyǧyna» baryp ötınış bıldıruı kerek.
Künaiym SÄKEN
