Elordada tegın järmeŋke öttı. Şarany Respublikalyq bıryŋǧai «Jas Ūlan» balalar men jasöspırımder ūiymy Greental äleumetık dämhanasymen bırlesıp, «BizBirgemiz: Taza Alem» jalpyūlttyq jobasynyŋ aiasynda ūiymdastyrdy. Järmeŋke Dostyq köşesı, 13 mekenjaiynda Greental dämhanasynda öttı.
Järmeŋkenıŋ erekşelıgı tūrǧyndar mūnda özderınıŋ qajettılıgın joǧaltsa da, sapasy saqtalǧan zattaryn äkelıp, olardy körmege qoiylǧan kez-kelgen būiymdarǧa aiyrbastai aldy. Meilı ol kıtaptar, oiynşyqtar, kiımder bolsyn, şekteu joq. Mäselen, elorda tūrǧyny Nūrjıgıt Tasbolatov tastauǧa qimaityn, bıraq özıne syimaityn ekı köilek pen şalbaryn äkelıptı. «Järmeŋkenıŋ jarnamasyn äleumettık jelıden körıp, qatty quandym. Üide kerek bolyp qalady deitın, bıraq bosqa tūrǧan zattar köp. Solardyŋ bärın osynda bergım kelıp otyr. Kıtap, sömkeler, kiımder bar. Olardy qoqysqa tastauǧa qimaimyn. Onyŋ ornyna jaŋa närse aluǧa bolady, öte igı şara. Jiı ūiymdastyrylsa eken» dedı ol.
Aiyrbastyŋ būl türı zattarǧa jaŋa ömır syilap qana qoimai, uaqyt pen qarajatty, türlı resursty ünemdeuge septıgın tigızedı deidı Respublikalyq bıryŋǧai «Jas Ūlan» balalar men jasöspırımder ūiymynyŋ töraiymy Dinara Saduaqasova. «Şara maqsaty – zattarǧa ekınşı ömır syilau, astarynda ekologiia mäselesı tūr. Tūrǧyndarǧa eskı zatty sūryptau keregın körsetu. Elorda boiynşa ekınşı ret ötkızılıp jatyr. Järmeŋkege türlı zattar alyp kelude. Kıtap, kiımder, kürteşeler, aiaq kiımder men türlı äşekei-būiymdar, su jaŋa gadjetterdı de köruge bolady. 
Aldaǧy uaqytta da ūiymdastyru oida bar. Keluşıler dän riza» dedı joba jetekşısı.
Körmege türlı būiymdar qoiylǧan, eşqaisysyn qoldanylǧan deuge kelmeidı. Sapasy saqtalǧan, öndırısten jaŋa şyqqandai. Mūndai igı şaranyŋ bolatynyn esıtıp, özınıŋ süiıktı kıtaptarymen bölısudı ūiǧarypty Aijan Orazhan. «Menıŋ oiymşa, būl syilyqtar järmeŋkesı. Özıŋe kereksız bolyp qalǧan emes, eŋ jaqsy köretın zatyŋdy syilau qajet. Ne alamyn dep kelmei, nendei keremet zat bere alamyn dep oilandym. Sodan «Abai joly» romanynyŋ 4 tomyn ala keldım. Ärbır jas oqu kerek. Al onyŋ ornyna psihologiialyq 3 kıtap aldym. Bırınşı ret keluım emes, ötken jyly da qatysqanmyn. Öte paidaly şara, köbırek ūiymdastyrylsa jaqsy bolar edı. Öz üiınde zattaryn sūryptaudy üirense, ol adam qoqysty da bei-bereket tastaudan aulaq bolady. Jalpy, özımdı ekologiia mäselesı bei-jai qaldyrmaidy. Sondyqtan şaraǧa belsene qatysudy jön kördım» dep pıkırın bıldırdı ol.
Al Alihan Rahmet bolsa, mūndai bastama qazaq halqynyŋ salt-dästürınde de körınıs tabady deidı. «Dästürımızde aǧasy kigen kiımdı ınısı kiedı, odan qala berdı auylǧa berıp jıberu bar. Ol öte dūrys dep oilaimyn. Būl şaranyŋ da negızı aitar oiy – kez-kelgen zatty sörede saqtai bermei, ekınşı ömır syilau. Mūqtaj janǧa syiǧa tartu. Men mūnda anamnyŋ qymbat bolsa da kimeitın köilekterı men bırneşe aiaq kiımın alyp keldım. Ornyna eşteŋe almaimyn. Tek tartu etkım keledı» deidı ol.
Järmeŋke soŋynda qalyp qoiǧan zattar qaiyrymdylyq ūiymdary men äleumettık dükenderge tapsyryldy.
Naima NŪRALYQYZY
