Dostyq üiınde Alǧys aitu künıne orai merekelık şara öttı. Oǧan Astana qalasy äkımınıŋ orynbasary Nūrlan Nürkenov jäne Parlament deputattary, Qazaqstan halqy assambleiasynyŋ ökılderı qatysty.
Keşe byltyr ǧana boi kötergen Dostyq üiı, şyn mänınde, dostyqtyŋ şat külkısı şalqyǧan şaŋyraǧyna ainaldy. Merekenı toilauǧa kelgen özge etnos ökılderı qiyn-qystau jyldary qamqorlyq körsetken qazaq halqyna rizaşylyqtaryn bıldırdı. Elorda äkımınıŋ orynbasary Nūrlan Nürkenov jinalǧan qauymdy Alǧys aitu künımen qūttyqtap, ızgı lebızın jetkızdı.
Qalalyq Qazaqstan halqy assambleiasy keŋesınıŋ töraǧasy Ämırjan Älpeiısov bügıngı merekenıŋ tüpkı mänıne toqtaldy: «Jalpy, Alǧys aitu künı dep otyrǧanymyzben, şyndap kelgende, būl künı özge etnos ökılderı qazaq halqyna alǧystaryn aitady. Öitkenı halqymyz sonau otyzynşy jyldardaǧy quǧyn-sürgın, Ekınşı düniejüzılık soǧys uaqytynda bızge kelgen qanşama ūlt ökılderın qiyndyqtan saqtap qaldy. Sol kezderı özderı ekı aştyqty, otyzynşy jyldaǧy zūlmatty, odan keiıngı qandy qyrǧyndy basynan keşıp otyrsa da, basqa jaqtan kelgen otbasylarmen barymen bölısıp, janaşyrlyq körsettı» dedı ol.
Şara aiasynda türlı etnos ökılderınıŋ ūlttyq taǧamdar men qoldanbaly öner qaiyrymdylyq järmeŋkesı ūiymdastyryldy. Būdan tüsken qarjy Qaraǧandyda üidıŋ qūlauynan zardap şekken segız otbasyǧa baspana salyp beru üşın «Asyl adam» qoǧamdyq qoryna tapsyryldy. Mereke soŋy «Qazaqstan – bızdıŋ ortaq üiımız» atty konserttık baǧdarlamaǧa ūlasty.
