Ūlt josparynyŋ eŋ bırınşı baǧyty käsıbi memlekettık apparat qūrudy közdeidı. Osy maqsatty jüzege asyru üşın «QR Memlekettık qyzmet turaly» Zaŋyna bırqatar özgerıster engızılgen.
QR Memlekettık qyzmet ısterı ministrlıgınıŋ Memlekettık qyzmet departamentınıŋ direktory Äli Kömekbaevtyŋ tüsındıruınşe, memlekettık qyzmetke bırınşı ornalasqanda, tek tömengı lauazymdardan bastap jäne üş satydan tūratyn konkurstyq ırıkteu arqyly ornalasu tärtıbı qalyptastyrylǧan. Bırınşı satyda ümıtkerler zaŋnama men bılımı, bılıktılıgı, ikemdılıgı boiynşa test synaqtarynan ötedı. Ekınşı satyda QR Memlekettık qyzmet jönındegı ministrlık ümıtkerlerdıŋ jeke qasietterın tekseredı. Mūnyŋ ışınde qyzmetkerdıŋ ektikasyna, jūmys sapasyna, jemqorlyqqa tözbeuşılık tanytu qasietterıne män berıledı eken. Al üşınşı satyda memlekettık organ ümıtkerlermen äŋgımelesu arqyly olardyŋ beiındık bılımı men ikemdılıgın baǧalaidy. Konkurstan sättı ötkenderge tälımger bekıtılıp, 3-ten 6 aiǧa deiın synaq merzımı belgılenedı. Memlekettık qyzmetke bırınşı ret qabyldanǧandar üşın 3 aiǧa jeke beiımdelu jospary jasalady. Josparda belgılı bır maşyqtar men synaq tapsyrmalaryn igeruge bailanysty talaptar belgılengen. Tapsyrmalar oryndalmaǧan jaǧdaida memlekettık organnyŋ basşysy beiımdelu josparynyŋ şaralaryn qaita oryndauǧa mümkındık bere otyryp, synaq merzımın taǧy üş aiǧa sozuǧa qūqy bar. Al endı qyzmetke alynǧannan keiın memlekettık qyzmetşınıŋ mansaptyq ılgerleuı tek qana konkurstyq negızde ǧana jüzege asyp otyrady. Tömengı lauazymdarda atqarǧan jūmys ötılı de eskerıledı.
– Ūlt josparynyŋ 12-şı qadamynda jaŋa etikalyq erejelerdı engızu atap körsetılgenı belgılı. Memlekettık qyzmettı sättı jaŋǧyrtuǧa mümkındık beretın faktorlardyŋ bırı – etikalyq ūstanymdardy jetıldıru ekenı dausyz. Memlekettı basqaru jüiesınde etikalyq normalardyŋ būzyluyna äkelıp soqtyratyn jäne jemqorlyqty tuyndatatyn jaǧdailardy eskertu boiynşa şaralardy küşeituge basymdyq berıldı. Osylaişa QR jaŋa Etikalyq kodeksınde memlekettık qyzmetşılerdıŋ jūmysta jäne jūmystan tys jerlerde özderın ūstau qalyptary retteldı. Olardyŋ azamattarmen, ärıptesterımen, basşylyqpen jūmystan tys kezde qarym-qatynas jasau jäne jūrt aldynda söilesu standarttary da bekıtıldı. Qyzmettık etikany būzǧan memlekettık qyzmetker tärtıptık jauapkerşılıkke tartylady. Kodekste memlekettık qyzmettıŋ bedelıne nūqsan keltıretın äreketter de anyqtap körsetılgen. Oǧan şeşımderdı şyǧaru men daiyndau kezınde jeke jäne zaŋdy tūlǧalarǧa negızsız artyqşylyqtar körsetu, aqparat beruden bas tartu, ötkızıletın qūjattardy qabyldau kezınde zaŋdar qarastyrylmaǧan artyq talaptar qoiu jatady. Mūndai zaŋ būzuşylyqtarǧa jol bergender jūmystan bosatu, memlekettık qyzmetke qaita tapsyruǧa tyiym salu siiaqty tärtıptık şaralar qoldanu qarastyrylǧan, deidı jaŋa etikalyq ereje jönınde atalmyş ministrlıktıŋ Memlekettık qyzmetter departamentınıŋ direktory Ädılbek Mūqaşev.
Mamannyŋ maŋyz berıp aitqandaryna qaraǧanda, bügınde barlyq memlekettık organdarda, oblys äkımdıkterı men Astana jäne Almaty qalalary äkımdıkterınde etika jönındegı Keŋester qūrylǧan. Būl Keŋesterdıŋ ökılettıkterıne tek tärtıptık ısterdı qarau ǧana emes, sonymen qatar, jemqorlyqty tuyndatatyn jaǧdailarǧa taldau jasau, jemqorlyqqa qarsy monitoring jürgızu kıredı. Etika jönındegı Keŋestıŋ qūramyna mäslihat deputattary, qoǧamdyq bırlestık ökılderı, BAQ ökılderı jäne jekelegen organdardyŋ basşylary alynǧan.
Būl keŋes öz kezegınde memlekettık qyzmetkerlerdıŋ etikalyq erejelerdı saqtauyna, memlekettık qyzmet jüiesındegı jemqorlyqty meilınşe azaituǧa, sondai-aq halyqqa körsetıletın qyzmetter deŋgeiın arttyruǧa mümkındık beredı. Memlekettık apparattyŋ qyzmetın jetıldıruge yqpal etedı. Söitıp, käsıbi memlekettık apparat basqaratyn qoǧamǧa auysatyn bolamyz. Ūlt josparynyŋ eŋ basty baǧyty – osy.
Meŋdolla ŞAMŪRATOV
