Qazaqstan Respublikasy Biudjettık kodeksınıŋ 75, 76-baptaryna säikes, Astana qalalyq mäslihatynyŋ tūraqty komissiialary Astana qalasynyŋ 2014-2016 jyldarǧa arnalǧan biudjetınıŋ jobasyn talqylauǧa kırıstı. Osyǧan orai, A.Baigenjinnıŋ töraǧalyǧymen mäslihattyŋ äleumettık-mädeni damytu mäselelerı jönındegı tūraqty komissiiasynyŋ otyrysy öttı. Onda Ekonomika jäne biudjettık josparlau basqarmasy basşysynyŋ orynbasary Gülnär Jüsıpova baiandama jasady. Odan ärı deputattar qalalyq Mädeniet; Turizm, sport jäne dene tärbiesı; Işkı saiasat jäne Tılderdı damytu basqarmalarynyŋ aldaǧy üş jylǧa arnalǧan biudjet jobalary men strategiialyq josparlaryn talqylady.
Aldymen söz alǧan qalalyq Işkı saiasat basqarmasynyŋ basşysy Bolat Tılepov baǧdarlamalar boiynşa 2014 jylǧa biudjettıŋ 500 millionǧa köbeigenın, būl elordada munisipaldyq telearnanyŋ qūryluyna bailanysty ekenın jetkızdı. Sebebı, bügıngı taŋda būqaralyq aqparat qūraldary köp jaǧdaida qoǧamdyq pıkır qalyptastyruda aiqyndauşy faktor retınde, elde ǧana emes, sonymen bırge älemde oryn alǧan oqiǧalarǧa äser ete otyryp, memleket pen qoǧam jüiesınde maŋyzdy oryn alady. Sondyqtan, bızdıŋ qalamyzǧa osyndai munisipaldyq telearnanyŋ qajettıgı tuyndap otyrǧanyn aita kele, basqarma basşysy qazırgı taŋda qalalyq Qarjy basqarmasy osy telearnany qūryp, onyŋ materialdyq negızın jasap jatqanyn, al 500 million teŋge telearnanyŋ aqparattyq mazmūnyna arnalatynyn, qalǧan qarajat jyldaǧy jobalar boiynşa josparlanǧanyn jetkızdı.
Astana qalasyndaǧy Turizm, sport jäne dene tärbiesı basqarmasynyŋ basşysy Aitalap Qorǧambaevtyŋ aituynşa, balalar men jasöspırımderdıŋ sport mektepterı men sport klubtaryna keluşıler qatary jyl sanap artyp keledı. 2011 jyly olardyŋ sany 9 952 bolsa, ötken jyly 12 267-nı qūraǧan. Halyqaralyq deŋgeidegı jäne Qazaqstan Respublikasynyŋ sport şeberlerı ataǧyn ielengender de köbeigenımen, būl salada älı de bolsa köptegen sport ǧimarattary tehnikalyq jabdyqtaluy jaǧynan da, jarystardy ötkızu erejelerı men oqu-jattyqtyru jūmystaryn ūiymdastyru boiynşa da zaman talabyna sai kelmei otyr. Sondai-aq, Astana tūrǧyndary sanynyŋ kün sanap ösuımen jattyqtyruşy-oqytuşy qūramnyŋ, bılıktı mamandar tapşylyǧy sezıle bastady. Basqarma basşysy aldaǧy üş jylǧa josparlanǧan biudjet jobasynda osy mäselelerdı eskergen.
Qalalyq Mädeniet jäne Tılderdı damytu basqarmalarynyŋ basşylary da keler jyldyŋ biudjetıne bailanysty öz ūsynystaryn bıldırdı. Halyq qalaulylary bolsa atalmyş basqarmalar ūsynǧan biudjettık baǧdarlamalar äkımşılerınıŋ strategiialyq josparlaryn maqūldady.
Gülbarşyn ÖKEŞQYZY
