Kölık kartasy: ozyq ülgınıŋ olqylyqtary

Prezident Joldauynda Ükımetke «Sifrly Qazaq­stan» baǧdarlamasyn jüzege asyru jaiy jüktelgenı belgılı. Onyŋ aiasynda igı bastamalar bastau aldy. Solardyŋ bırı – qoǧamdyq kölıkterdegı jolaqynyŋ jaŋa jüiege ötuı jūrt arasynda qyzu talqylanǧan edı. Bügınde jūrt paidalanyp jürgen elektrondy kölık kartasy men elordalyqtar jiı qoldanatyn «Astra Bus» qosymşasynda olqylyqtar da joq emes.

Osy jyldyŋ 21 şıldesınen Astanadaǧy qoǧamdyq kölıkter tolyǧymen sandyq jüiege ötkenı belgılı. Qala tūrǧyndarynyŋ jaŋa baǧytqa jyldam qosyluy üşın qolma-qol jolaqy qūny 180 teŋgege köterılse, arnaiy karta 90 teŋge kölemınde qaldy. Osynyŋ nätijesınde bügınge deiın elektrondy kartany qoldanuşylar sany kürt artty. Ärbır jaŋa bastamanyŋ bastapqyda kemşın tūstarynyŋ boluy – zaŋdylyq, alaida problemalardyŋ uaqtyly şeşıluın kez kelgen mekeme basty nazarda ūstauy tiıs.
Būl jüie alǧaş engızılgende kei kartalardyŋ tölem qabyl­damai, sonyŋ saldarynan jo­lauşylardyŋ orynsyz aiyppūl tölegen sätterı de kezdesken. Odan bölek, kölık kartasyna aqşa toltyru üşın terminaldarda jinalǧan jūrtta esep bolmaityn. Elordalyqtardyŋ būl problemasy älı künge deiın şeşılmei keledı. Astanadaǧy sanau­ly appa­rattyŋ janynda ūzyn-sonar kezek bolady. Osy ıs şeşılu üşın «Astana LRT» JŞS tölemaqynyŋ özge de türlerın şyǧarǧany aita ketu kerek. Qazırgı uaqytta jolaqyny SMS-habarlama, QR-kod arqyly töleuge mümkındık bar. Dei tūrǧanmen, sanauly apparattyŋ sanyn arttyryp, kezektıŋ mäselesı bırjaqty etıl­genı jön. Äitpese, kölık kartasy nege kerek degen saual tuyndaityny – zaŋdylyq.
Aita keter taǧy bır jait, «Ministrlıkter üiı» aial­da­ma­synyŋ maŋyna osyndai appa­rattyŋ üşeuı ornatylǧan. Şynyn aitu kerek, karta toltyratyn avtomattyŋ bügınge deiın jūmys ıstemegen künı basym. Qalyŋ kezekte tūryp, äreŋ jetkende aiaq astynan ıstemei qalatyny kımnıŋ bolsyn aşuyna tiıp jatady.
– Qap, osy üşın qanşa uaqytym kettı. Äreŋ degende jetkende, jūmys ıstemei qalǧanyn qaraşy. Bükıl jūmysymdy tastap, kezekke tūryp edım. Endı jolaqyny ekı ese baǧamen töleitın boldym ǧoi. Ne bolǧanyn bılmeimın, soŋǧy ekı-üş aptada däl osy apparat jöndı jūmys ıstemeitın boldy, – dep keiıdı Kämila esımdı qala tūrǧyny.
Atalǧan mekenjaidaǧy prob­lema mūnymen şektelmeidı. Soŋǧy uaqytta qaǧaz aqşa qa­byldamaityn aqauy paida bolǧan. Jolaqyny SMS-ha­barlama nemese QR-kodpen tö­leuge bolar, bıraq 1 millionnan asa tūrǧyny bar Astanaǧa jetkılıktı türde avtomattar ornatylyp, mäselenıŋ tiıstı deŋgeide şeşıluı tiıs dep oilaimyz.
«Astana LRT» töŋıregındegı problema mūnymen şektelmeidı. Elordadaǧy avtobustyŋ baǧyt-baǧdaryn körsetıp tūratyn ūialy telefonǧa ornatylatyn «Astra Bus» qosymşasy bar. Bırer jyl būryn, iaǧni 2016 jyly qosylyp, tūraqty türde jūmys ıstep keledı. Osy arqyly kez kelgen avtobustyŋ qai tūsta ketıp bara jatqanyn bıluge bolady. Qala tūrǧyndary men qonaqtary üşın yŋǧaily qosymşalardyŋ bırı bolǧany anyq. Degenmen arada ekı jyldan asa uaqyt ötse de «Astra Bus» töŋıregınde şeşımın tappai tūrǧan mäseleler barşylyq. Mäselen, atalǧan qosymşaǧa engen qoǧamdyq kölıkterdıŋ basym bölıgıne GPS jüiesı ornatylmaǧan. №61 baǧytyndaǧy avtobus jürgızuşısınen sūraǧanymyzda jaŋadan qosylǧan avtobustarǧa GPS qoiylmaǧanyn alǧa tartty. Qazırgı uaqytta atalǧan qosymşa arqyly №1, 3, 7, 11, 26, 32, 35, 36, 38, 39, 42, 60, 61, 71, 72, 80, 120, 127 baǧytyndaǧy kölıkterdıŋ qai tūsta kele jatqanyn bılu mümkın emes. Al Astananyŋ saqyldaǧan sary aiazynda avtobus kütıp tūru qiiamet dese bolady.
Qoryta aitar bolsaq, Elbasy­nyŋ «Sifrly Qazaqstan» baǧ­darlamasy tolyǧymen jüzege asyryluy tiıs. Alaida ärbır ūiym, mekeme joǧaryda aityl­ǧandai qiyndyqtar tuyndamas üşın būl ıske jan-jaqty daiyn küide kelgenı dūrys. Damyǧan memlekettermen iyq tırestıru üşın el tūrǧyndarynyŋ jaily ömırı men qūqyǧy bırınşı kezekte oilastyryluy tiıs.