Halyqqa qyzmet körsetu ortalyqtarynda avtokölıktı bır saǧat ışınde tırkeuge mümkındık beretın pilottyq joba ıske qosyldy. Uaqytty qysqartu ortalyq mamandarynyŋ QR IIM Äkımşılık polisiiasy komitetı men QR Qarjy ministrlıgınıŋ aqparattyq jüielerıne tüzetu qūqyǧynsyz kıru märtebesın alǧannan keiın mümkın bolyp otyr.
«Azamattarǧa arnalǧan ükımet» memlekettık korporasiiasy» AQ Basqarma töraǧasy Daniiar Erenchinovtıŋ aituynşa, būryn kölık ielerı 40 minuttan asa uaqytyn tiıstı mamandarda aiyppūldar men salyqtar töleuge jūmsaityn. «Jobany ıske qosqanǧa deiın Halyqqa qyzmet körsetu ortalyǧyna kelgen klient 3 elektrondyq kezek talonyn alatyn. Bırı – aiyppūldardy tekseru üşın äkımşılık polisiiasy qyzmetkerıne, ekınşısı – salyq tölemderın tekseru üşın salyq qyzmetkerıne, üşınşısı – tolyq qūjattar toptamasyn ötkızu üşın HQKO qyzmetkerıne bolatyn. Būl rette, eger azamattyŋ tölenbegen aiyppūldary men salyqtary bar bolsa, ony töleu üşın kassaǧa bölek kezekke tūratyn. Endı memlekettık korporasiia qyzmetkerı klienttıŋ avtokölıgıne aiyppūldary nemese salyq bereşekterı bar-joǧyn öz betınşe teksere alady. Eger bar bolsa, elektrondyq ükımet portalynyŋ tölem şliuzı arqyly kartochkamen töleuge bolady nemese mamandandyrylǧan HQKO ǧimaratynda ornalasqan bank kassalary arqyly tölei alady» deidı ol.
Kölıktı qaita tırkeu memlekettık qyzmetınıŋ merzımın saqtaudy situasiialyq ortalyqtyŋ mamandary qadaǧalap otyrady. Qūjattar merzımı būzylǧan jaǧdaida, onyŋ sebebın anyqtap, aldaǧy uaqytta būzuşylyqqa jol bermeu şaralaryn qabyldaidy.
Aita ketsek, mamandandyrylǧan halyqqa qyzmet körsetu ortalyqtarynda elımız boiynşa kölıkterdı qaita tırkeu qyzmetterın 435 706 qazaqstandyq paidalanǧan eken.
