Bügın qazaq halqynyŋ köneden kele jatqan merekelerınıŋ bırı – Körısu künı. Būl kündı atap ötu dästürı negızınen Qazaqstannyŋ batys oblystarynda saqtalǧan, dep habarlaidy QazAqparat.
14 nauryz künı jasy kışıler aqsaqaldar men aq jaulyqty äjelerge baryp, qos qolyn berıp, körısedı. Būl künı jasy ülkender kışılerdı kütıp, kelgenderge «Bır jasyŋmen! Jas qaiyrly bolsyn, ömır jasyŋ ūzaq bolsyn!» dep erekşe meiırımmen batasyn beredı. Osy künı är üide dastarhan jaiylyp, ūlttyq taǧamdar qoiylyp, adamdar bır-bırımen qūşaq jaia amandasyp, esendık sūrasady. Köŋılde ökpe-renışterı bolsa, keşıredı. Tatulyqqa bastaityn būl jol islam qaǧidattaryna da öte jaqyn.
Būl mereke Batys Qazaqstan, Atyrau oblystarynda jäne Aqtöbenıŋ keibır audandarynda, Reseidıŋ körşıles Astrahan, Saratov, Orynbor öŋırlerınde, Qaraqalpaqstanda atalyp ötedı. Körısu – qazaq halqynyŋ öskeleŋ ūrpaqty ızettılık pen meiırımdılıkke, auyzbırşılık pen kışıpeiıldılıkke, tatulyq pen bauyrmaldyqqa bastaityn erekşe ürdısterınıŋ bırı. Būl merekenı Maŋǧystau öŋırınıŋ jūrty Amal merekesı dep te ataidy. Soŋǧy jyldary Qazaqstanda meiram aiasy keŋeiıp keledı.
Mäselen, biyl alǧaş ret Qyzylorda oblysynda osy mereke toilanbaq.
