Keşe Nūr-Sūltan qalasy mäslihatynyŋ 47-ınşı kezektı sessiiasy öttı. Kün tärtıbıne on bır mäsele qoiylǧan jiynǧa Parlament Senatynyŋ deputaty Serık Jaqsybekov qatysty. Negızgı mäsele – elordadaǧy mädeniet, dene şynyqtyru men sporttyŋ jaǧdaiy turaly, osy salalardy ärı qarai damytu jūmysy jaily qala äkımınıŋ orynbasary Nūrlan Nūrkenov baiandama jasap, mäslihat deputattarynyŋ sūraqtaryna jauap berdı.
Baiandamaşy «Elordamyz elımızdıŋ saiasi ortalyǧy retınde ǧana emes, özınıŋ mädeni jäne ruhani biık märtebesın jan-jaqty körsetıp kele jatyr» dei kele, būl baǧyttaǧy statistikalyq derektermen tanystyrdy. Atap aitqanda, qysqy mausym boiy şaharda ūiymdastyrylǧan «Astana Winter Land» festivalı aiasynda 19 nysan qyzmet körsettı. Konkilerdı, şaŋǧylardy jalǧa beru oryndary syndy osy nysandarǧa qys ışınde 400 myŋnan astam kelu tırkelgen.
Būl nysandarǧa bır adam tört ret bardy dep eseptegende, 100 myŋ adamdai şyqqanyn aitqan N. Nūrkenov qazır qala äkımınıŋ tapsyrmasymen qysqy demalystyŋ ǧana emes, halyq üşın jalpy jyl boiǧy demalystyŋ jospary jasalyp jatqanyn jetkızdı. Iаǧni, köktemgı, jazǧy, küz ben qysqy demalystarǧa neǧūrlym köbırek adam tartylmaq. Demalys keŋıstıgı keŋeitılıp, bälkım, būl üşın investorlarǧa jer telımderı bölınedı.
«Qalamyz elımızdıŋ sporttyq astanasy bolyp tanyldy. Elordada aimaqtarmen salystyrǧanda sporttyq nysandar köp ornalasqan. Üzdık sportşylar men jattyqtyruşylar, sport salasyndaǧy jetekşı mamandar osynda tūryp, eŋbek etıp jatyr» degen qala basşysynyŋ orynbasary sport salasyndaǧy jetıstıkterge de toqtaldy.
Mädeniet pen sporttaǧy jetıldırudı qajet etetın mäselelerdı de jasyrmai, tüitkılderdı atap, olardy şeşu boiynşa jūmys jürgızıletının aitty. Sonyŋ bırı Astanalyq sirk, Quyrşaqtar teatry, bi ūjymdarynyŋ ärtısterıne qatysty bolyp otyr. Olar eŋbek jäne zeinetaqy zaŋnamalaryna zeinetke şyǧu jasyn tömendetu boiynşa özgerısterdı engızudı sūraǧan. «Būryn eŋbek sıŋırgen qairatkerler sahnada 20 jyl jūmys ıstegennen keiın zeinetke şyǧatyn. Qazır äielder üşın zeinet jasy – 59 jas. Bolaşaqta būl jas 63-ke jetedı. Al erlerde – 63 jas. Mamandyq erekşelıkterıne bailanysty, atap aitqanda, sirk, balet ärtısterı būl jasqa jetkenşe jūmys ıstei almaidy. Osy mäsele Parlamentte qaraldy. Alaida älı de aşyq bolyp tūr. Tiıstı jūmysty jalǧastyramyz» dedı N. Nūrkenov.
Mädeniet jäne sport salalarynyŋ qyzmetkerlerı üşın qoljetımdı baspana mäselesı de özektı ekenın aitqan äkım orynbasary elordada qazır būl salalarda 3800-den asa adam jūmys ıstep jatqanyn, olardyŋ 2 myŋǧa juyǧy tūrǧyn üi kezegınde tūrǧanyn jetkızdı. Olardyŋ arasynda baspanalaryn keŋeitkısı keletınder de bar.
«Baspanany jalǧa beru nemese şaǧyn otbasylarǧa arnalǧan jataqhanalardy salu jolymen būl mäselenı şeşe alar edık. Qazırgı kezde Qorǧaljyn tasjolynyŋ boiynda jataqhana salu üşın jer telımı bölındı. Būl mäsele boiynşa jūmystyŋ belsendı jürgızıluıne atsalysamyz» dedı qala basşysynyŋ orynbasary.
Mektep oquşylary men kolledj studentterı būl künderı qala teatrlaryna az baratyn bolǧan. Onyŋ sebebı, bılım beru mekemelerınde biletterdı satuǧa tyiym salyndy. «Qazırgı taŋda teatr körermenderı köbeigen. Alaida oquşylar men studentterdıŋ ülesı azaiǧan. Būryndary teatr onkündıkterı ötkızılıp, onda oqu baǧdarlamasyna säikes jäne patriottyq-adamgerşılık tärbie beru maqsatynda barlyq mektepterdıŋ oquşylary teatrlarǧa baratyn. Būl mäsele bızdıŋ baqylauymyzda. Ärine, mektep oquşylary men kolledj studentterın qalanyŋ mädeni ömırıne tartu mümkındıkterın qarastyramyz» dedı Nūrlan Jaŋbyrşyūly.
Juyrda qalalyq mäslihat deputattary bırqatar mädeni jäne sporttyq nysandardy aralap, sondaǧy tüitkılderdı anyqtady. Onyŋ bırı Astanalyq sirkke qatysty boldy. Ǧimarattyŋ bır bölıgı senımdı basqaruǧa berılgen. Qala basşysynyŋ orynbasary tekserıs qorytyndysynda sirktıŋ tömengı qabatynda ornalasqan tamaqtanu ornyn jalǧa alǧan adam örtke qarsy talaptardy saqtamaǧany, mümkındıgı şekteulı jandarǧa arnalǧan pandusty būzyp tastaǧany anyqtalǧanyn aityp, onymen äŋgıme jürgızılgenın, deputattardyŋ eskertpelerıne säikes mäsele şeşıletının jetkızdı.
Balalar men jasöspırımder sportyndaǧy tüitkılderdı atap ötken N. Nūrkenov sport mektepterınıŋ materialdyq bazasyn küşeitu, jaŋa sporttyq qūraldardy satyp alu kerektıgın, jalpy qalada jaŋa sporttyq nysandardy salu, baryn jaŋǧyrtu qajettıgın aitty.
Jöndeudı qajet etetın mädeni nysandarǧa toqtalǧan qala basşysynyŋ orynbasary, sonyŋ ışınde «Jastar» teatryna toqtaldy. «Ǧimarat 1954 jyly salynǧan. Būl tarihi jäne mädeni eskertkış bolyp sanalady. Nysan 2014 jäne 2018 jyly jöndeldı. Alaida kürdelı jöndeuden ötpedı. Bız aqau şyqqan jerge qatysty akt daiyndap, endı jobalyq-smetalyq qūjatty äzırleimız» degen N. Nūrkenov «Mäŋgılık el» saltanat qaqpasyna qatysty mäselenı atady.
«Nysannyŋ qūrylysy kezınde jerasty ötkelı üstındegı kölık joly sapasyz salynǧan. Jyl saiyn jürgızıletın aǧymdaǧy jöndeu jūmystary mäselenı şeşpei tūr. Joldy qaita salu üşın 600 mln teŋgeden astam qarjy kerek» dedı qala basşysynyŋ orynbasary.
Sondai-aq «Tolqyn» sport keşenınıŋ şatyryn jöndeuge qarjy kerektıgın aityp, qalada sporttyq gimnastika, batuttyq gimnastika, sporttyq bi siiaqty sport türlerımen ainalysuǧa zaldyŋ joqtyǧyn, därıgerlık-dene şynyqtyru dispanserdıŋ salynbaǧanyn jetkızdı. Sportşylardy tekseru qazır №5 qalalyq emhanada jürgızıletının, būl jait mäselenı şeşpei kele jatqanyn, dispanserdı salu kerektıgın aitty.
