Biyl elordada Ūly Otan soǧysy qatysuşylary men mügedekterıne Jeŋıs künıne orai qosymşa äleumettık kömek körsetu üşın jergılıktı biudjetten 25 mln 900 myŋ teŋge bölu qarastyrylyp otyr. Osy sanatqa jatatyn 74 adamnyŋ ärqaisysy 520 myŋ teŋgeden alady.
Keşe qalalyq qoǧamdyq keŋes otyrysynda Jūmyspen qamtu jäne äleumettık qorǧau basqarmasy basşysynyŋ orynbasary Artem Äbıldinov osylai dep mälımdedı. Keŋes müşelerı būl ūsynysty bırauyzdan qoldady.
Qalalyq Qoǧamdyq densaulyq saqtau basqarmasy qoǧamdyq keŋeske osy saladaǧy kommunaldyq qazynalyq käsıporyndary öndıretın jäne satatyn tauarlardyŋ, jūmystardyŋ, qyzmetterdıŋ qūnyn belgıleu turaly qaulynyŋ jobasyn jıbergen bolatyn. Būl qūjatpen atalmyş basqarma basşysynyŋ orynbasary Bibıgül Myrzabekova tanystyrdy.
Sonyŋ ışınde JİTS-tıŋ aldyn alu jäne osy aurumen küres ortalyǧynda Qazaqstan Respublikasynyŋ azamattary men oralmandar tegın tekserıle alatyny aityldy. Būl ortalyq aqyly qyzmettı tek şeteldık azamattarǧa körsetedı. Ötken jyly būl mekemede 3 myŋ 254 adam qaralǧan. Densaulyq saqtau ministrlıgınıŋ tiıstı būiryǧyna säikes aqyly qyzmet 1444 teŋge bolyp belgılengen.
Alaida bas qaladaǧy JİTS ortalyǧy būl qyzmettı 980 teŋgege körsetedı. Būl ministrlıktıŋ būiryǧyna qaişy kelıp tūr. Ortalyq baǧasy 2016 jyldan berı özgermei kele jatyr. Al basqa öŋırlerde atalǧan qyzmet qymbattau. Mäselen, Almaty, Qaraǧandy, Soltüstık Qazaqstan jäne Pavlodar oblystarynda – 2 myŋ teŋge, Maŋǧystau men Atyrau oblystarynda – 3080 teŋge. Osyǧan bailanysty qalalyq Qoǧamdyq densaulyq basqarmasy baǧany köterudı qoldaudy sūrady. Qoǧamdyq keŋes müşelerı būl mäselenı bıraz talqylap, öz ūsynys-pıkırlerın aitty.
