Astanada Ortalyq kommunikasiialar qyzmetınde QR Mädeniet jäne sport ministrı Arystanbek Mūhamediūly jurnalistermen jüzdesıp, baspasöz mäslihatyn ötkızdı. Onda elımızdegı mädeniet salasynyŋ damuy men alda jüzege aspaq jobalar turaly söz boldy.
Aitalyq, qazaq mädenietın şet memleketterde nasihattaityn «Mäŋgılık mūra» atty joba qolǧa alynǧan. Atalǧan joba elımızdıŋ tarihi-mädeni damuyna erekşe serpın bermek. Būl elımızdıŋ bai mädeni mūrasyn älemdık qūndylyqtar qorymen yqpaldastyruǧa baǧyttalǧan.
Sondai-aq, bızdıŋ eldegı muzeilerdıŋ jūmys formaty da özgertılmek. Ol älemge äigılı Luvr, Ermitaj, Vatikan syndy muzeilerdıŋ täjıribesın eskere otyryp jasalady. Jäne QR Ūlttyq muzeiınde Qazaqstan halqy assambleiasynyŋ zaly aşylady dep josparlanuda.
«Mädeniet saiasaty tūjyrymdamasy boiynşa atalmyş saladaǧy menedjmenttı özgertu közdelıp otyr. Sala ekonomika sektory retınde oŋtailandyrylady. Ekonomikalyq belsendılıktı arttyru maqsatynda jetekşı muzeiler men kıtaphanalardyŋ äkımşılık-qūqyqtyq formasy memlekettık mekemeden qazynalyq käsıporynǧa auystyrylady» dedı ol.
Taǧy bır jüzege aspaq tyŋ jobany aitsaq deimız. Aldaǧy taŋda Qazaqstannyŋ elektrondy ensiklopediiasy jasalady. Būl joba «EKSPO-2017» körmesınde Qazaqstandy tanystyru aiasynda öte özektı bolmaq.
Onyŋ aituynşa, ministrlık EKSPO şarasyna bailanysty arnaiy jospar jasaǧan. Sonyŋ negızınde «EKSPO-2017» körmesınde elımızdıŋ älemdegı tarihi jäne geosaiasi maŋyzy turaly tūsaukeser ötkızılmek. «EKSPO-2017» körmesı men halyqaralyq jäne elordanyŋ qarjylyq ortalyq retındegı äleuetı mädeni-turistık klasterdı qūruǧa qajettı bas qalanyŋ jaŋa mädeni infraqūrylymynyŋ damuyn talap etedı» deidı A.Mūhamediūly.
Azamat ESENJOL
