4 mausym – Qazaqstan Rspublikasy Memlekettık rämızderınıŋ künı. Osyǧan bailanysty «Qaztūtynuşylarodaǧynyŋ» Sauda-ekonomikalyq kolledjınde Parlament Senaty Konstitusiialyq zaŋnama, sot jüiesı jäne qūqyq qorǧau organdary komitetınıŋ töraǧasy Serık Aqylbaimen kezdesu öttı.
Otandy süiu – Memlekettık rämızderge degen qūrmetpen astasyp jatatynyn aitqan komitet töraǧasy elım degen är azamat eldıgımızdıŋ tıregı bolǧan Memlekettık nyşandardy qasterleuge tiıs ekendıgın atap öttı. Kezınde Änūrandy qalai tyŋdau kerek degen mäsele köterılgende «oŋ qoldy jüregımızdıŋ tūsyna qoiyp tyŋdau kerek» degen bastama kötergen deputattardyŋ bırı – osy Serık Baiseiıtūly bolatyn. «Oŋ qoldy jürektıŋ tūsyna aparyp, Änūrandy tyŋdau – Otanyŋdy jüregıŋmen sezın, tuǧan jerdıŋ qasietın jüregıŋmen tüsın, Otanǧa degen qyzmetıŋdı jüregıŋmen jasa» degen maǧynany bıldıretının jastarǧa egjei- tegjeilı tüsındırgen senator täuelsız el ekenımızdı aişyqtaityn da Memlekettık nyşandar ekendıgın atap körsettı.
Kezdesu barysynda zaŋ şyǧaru jäne qabyldau ısı de söz boldy. Zaŋ şyǧarudyŋ kürdelılıgıne toqtalǧan senator zaŋdyq qūjattarda ketken bır qatelıktıŋ özı qoǧamǧa ülken zalal keltıretının, sondyqtan ol jan-jaqty talqylaudan ötıp, ūzaq qaralatynyn jetkızdı.
Jüzdesu soŋynda Serık Aqylbai studentterdıŋ saualdaryna jauap berdı.
Erkejan SÄTIMBEK
