Ai men künnıŋ amanynda Almatydaǧy Nazarbaev ziiatkerlık mektebınen şu şyqty. Şuǧa sebep bolǧany – mektepke tüsuge ümıtkerlerge grant böludegı ädıletsızdık. Oǧan jany tözbegen 50 şaqty ata-ana mektepke jinalyp, memlekettık tıldıŋ müddesın janyn salyp qorǧap jürgen Mäjılıs deputaty Qazybek İsaǧa beine-aryz jıberdı. Olar mektepke qūjat tapsyrǧan qazaq balalary orys synybyna tapsyruşylardan ekı esege köp bolǧandyqtan talapkerlerdı qazaq-orys dep böludı, ekeuıne bırdei 100 baladan qabyldaudy «Būl baryp-tūrǧan alalau!», «Memlekettık tıldı kemsıtu!» deidı.
Almatydaǧy himiia-biologiia baǧytynda bılım beretın Nazarbaev ziiatkerlık mektebıne 2022-2023 oqu jylyna 2178 oquşy testı tapsyrǧan. Sonyŋ ışınde 1483-ı – qazaq tılınde (68 paiyz), 695-ı – orys tılınde (32 paiyz) tapsyrǧandar. Mysaly, Şamalǧandaǧy mektepke qūjat tapsyrǧan 1500 balanyŋ arasynan 1174 ball alǧan oquşy bar. Ol 111-şı orynda tūr. Al orys tobyndaǧy 7-şı orynda tūrǧan balanyŋ jinaǧan baly onykınen 48 ballǧa tömen. Sonda da az ball jinaǧan bala oquǧa tüsıp tūr. Būl – memlekettık tıldı qorlau, alalau dep tüsınu kerek! Bılımdı, sauatty, üzdık, ozat bolǧany üşın oquǧa tüse almai pūşaiman bolǧan balanyŋ jan jarasy kım jazady?
Deputat Q. İsa mūndai soraqylyqtyŋ Almatyda ǧana emes, Öskemende de bolǧanyn aitady. «Mūndai qiianattyŋ körsetkışı Öskemende 200 ball aiyrmaşylyqty körsetıp tūr. Būl ne masqara! Ata-analar aitqandai, oquşylardy teŋgermeşılıkpen ekıge bölıp tastamai, grant bärıne bırdei talappen boluy kerek. Auzyna qūm toltyryp alǧandai Nazarbaev mektebı basşylyǧynan älı tyrs etken ün joq! Nazarbaev ziiatkerlık mektebınıŋ Küläş Şämşiddinova bastaǧan basşylary osy mektepterdıŋ qai memlekette ornalasqyndyǧyn jäne Täuelsızdık alǧanymyzǧa 30 jyldan asyp ketkenın bıle me eken?!. Mūndai jymysqy saiasattyŋ maqsaty – keler jyly qorlyqqa şydamaǧan el balalaryn orys synybyna bere bastaidy» deidı ol.
Saiyp kelgende, üş tıldı bıletın qazaq tobyndaǧy balalardyŋ artyqşylyǧy bar. Iаǧni, kerısınşe, qazaq tılınde synaq tapsyratyndarǧa basymdyq beru kerek! Bılımge qūmar är bala jaqsy mektepte oquǧa, bılım aluǧa qūqyly.
