Nūr-Sūltan qalasynyŋ äkımdıgı sport künıne orai būqaralyq veloşeru ūiymdastyrdy. Merekelık ıs-şaraǧa qatysuşylar velosipedpen 14 şaqyrymdyq joldy jürıp öttı.
Saltanat saraiy janynan bastalǧan veloşeruge 1 myŋǧa juyq äuesqoilar qatysty. Äsırese, balalar men jastar köp boldy. Qatysuşylardy, sondai-aq barşa sportşylardy käsıbi merekesımen qūttyqtaǧan elorda äkımınıŋ orynbasary B.Mäken «Bügıngı veloşeru jastardy sportqa bauluǧa jäne salauatty ömır saltyn nasihattauǧa kömektesedı dep senemın. Barlyq qatysuşylarǧa sättılık pen ülken jeŋıster tıleimın!» degen lebızın bıldırdı. Äkımnıŋ orynbasary soŋǧy jyldary qala tūrǧyndarynyŋ būqaralyq sport tartyla bastaǧanyn, elordamyzda halyqaralyq jarystardyŋ ötkızıletının, osylaişa jalpy sport mädenietınıŋ joǧary deŋgeide damyp kele jatqanyn da atap öttı.
Velosiped mıngen köpşılık aldymen Qabanbai batyr daŋǧyly boiymen Ūly Dala köşesıne deiın keldı. Odan ärı Tūran daŋǧylynyŋ boiymen jürıp Ortalyq saiabaqta märege jettı. Veloşeruge qatysuşylar arasynda Mädeniet jäne sport ministrı Aqtoty Raiymqūlova, belgılı qoǧam qairatkerlerı, käsıpqoi sportşylar men velosport äuesqoilary boldy. Nūr-Sūltan qalasynyŋ Mädeniet jäne sport basqarmasy märege jetken, jalpy merekelık jarysqa tırkelgender arasynda köŋıl köteretın oiyndar da ūiymdastyrdy. Velosiped mınıp, köşede sergıp qaitqan köpşılık velosipedter jäne estelık syilyqtar alyp quanyp jatty.
Osy şaraǧa qatysqan äuesqoilardyŋ bırı Eleusız Pardabaev boldy.Ūlttyq qauıpsızdık komitetınıŋ zeinetkerı öz pıkırımen bölıstı.
– Zeinet demalysynda bolsam da, sporttyq şaralarǧa qatysudy ūnatamyn. Jügıru jäne jüzudı dästürıme ainaldyrǧaly qaşan. Al keşegı sport künıne orai ūiymdastyrylǧan veloşeruge kädımgıdei daiyndalyp keldım. Men üşın syilyq nemese jülde maŋyzdy emes, eŋ bastysy densaulyqqa paidaly bolsa boldy, mındettı türde qatysamyn. 14 şaqyrymdy tügeldei jürıp öttım. Jastar jaǧy köp bolǧany quantady. Salauatty ömır saltyn nasihattaityn ärı qalyptastyratyn osyndai jarystar qalanyŋ mädenietın özgertedı ǧoi. Elorda äkımdıgıne rahmet, osyndai köpşılıkke arnalǧan sporttyq ıs-şaralardy jiı ūiymdastyryp tūrsa, qatysatyn adam tabylady dep oilaimyn, – dedı sportty janyna serık etken äuesqoi sportşy.
