Qasiettı Qūrban ait merekesıne orai «Şans» («Mümkındık») äleumettık-qūqyqtyq qoldau ortalyǧynda jūrtşylyqqa tegın şaş qiiu aksiiasy ötkızıldı.
Aksiia barysynda tek şaş qiiu ǧana emes, sonymen qatar qyz-kelınşekterge manikiur, pedikiur jasau qyzmetterı de tegın ūsynyldy. Būl igılıktı ıske arnaiy kursta oqityn bırneşe şaştarazşy men manikiur jäne pedikiur jasau şeberlerı jūmyldyrylǧan bolatyn. Keluşıler de osyndai aksiianyŋ ötkızılıp jatqanyna dän riza boldy. Solardyŋ bırı – Nesıbelı esımdı boijetken.
– Men mūnda aksiia aiasynda şaşymdy tegın ärlep, manikiur jasattym. Qyzmet körsetu sapasy ūnady. Şeberlerge köp raqmet. Sol siiaqty, aksiiany ūiymdastyruşylarǧa da alǧysymdy bıldırgım keledı, – deidı Nesıbelı.
«Şans» äleumettık-qūqyqtyq qoldau ortalyǧynyŋ direktory Olga Ryl tılşıler tobyna Qūrban ait merekesıne arnalyp jaiylǧan dastarqan basynda sūhbat berdı. Äŋgıme barysynda Olga Vladimirovna jalpy «Şans» ortalyǧy jaily aityp öttı.
– «Şans» ortalyǧy balalyqpen qandai da bır būzaqylyq nemese zaŋǧa qarsy äreketter jasap, zaŋ aldynda jauapqa tartylǧan jasöspırımderge tüzu jol baǧyttap, olardyŋ bolaşaqta ekınşı qaitara qatelıkke boi aldyrmai, eŋbek etıp, el qatarly ömır süruıne qoldau körsetu maqsatynda 2010 jyly qūrylǧan. Ortalyq qalalyq äkımdıkpen, Bılım basqarmasymen jäne qūqyq qorǧau organdarymen tyǧyz qarym-qatynasta jūmys ısteidı. Işkı ıster organdarynyŋ kämeletke tolmaǧandardyŋ ısterı jönındegı uchaskelık polisiia inspektorlary baǧyttaǧan 9-17 jas aralyǧyndaǧy jasöspırımderdı qaramaǧyna alyp otyr, – deidı O. Ryl.
Olga Vladimirovnanyŋ aituynşa, atalmyş ortalyq aşylǧan künnen bastap myŋdaǧan jasöspırımge qoldau körsetken. Al qazırgı uaqytta ortalyq bazasynda 630 bala men jasöspırım tırkelgen eken.
Būl mekemede äleumettık mamandar men psihologtar jäne zaŋgerler – barlyǧy 19 maman qyzmet etedı. Sol siiaqty ortalyqta tırkeude tūrǧan balalar bos uaqyttaryn tiımdı paidalanu üşın dombyra, gitara, jol jüru erejelerın üiretu siiaqty üiırmeler de qarastyrylǧan. Aita ketu kerek, mūndaǧy barlyq qyzmet türlerı – tegın. Älbette, tek tırkeude tūrǧan balalar üşın ǧana. Sondai-aq, ortalyqta balalar qonaqüiı de qarastyrylǧan. Mäselen,türlı sebeptermen üiınen ketıp qalǧan balalardyŋ qandai da bır jamanşylyqqa ūrynyp qalmauy üşın bıraz uaqytqa osy qonaqüidı panalauǧa mümkındıkterı bar.
Jūmys oryndaryn aralata jürıp tanystyrǧan Olga Ryl qalalyq äkımdıktıŋ qoldauymen atalmyş ūiymnyŋ bazasynda tırkeude tūrǧan balalar üşın mekemenıŋ janyndaǧy bos orynǧa futbol alaŋynyŋ da salynǧanyn jetkızdı. Aituynşa, qazırgı uaqytta būl alaŋda yqşam audan tūrǧyndary da sportpen ainalysatyn körınedı.
Nūrdäulet KÄKIŞEV
