QR Täuelsızdıgınıŋ 25 jyldyǧyna arnalǧan «Quatty öŋır – quatty Qazaqstan» baǧdarlamasynyŋ aiasyndaǧy şaralar Astanadaǧy Almaty qalasynyŋ künderımen tüiındeldı. Myŋjyldyq şahar mädenietı ekı kün boiy elordada saltanat qūrdy.
QR Ūlttyq muzeiınde ötken «Almaty – Täuelsızdıktıŋ altyn besıgı» atty multimediialyq körme men Alatau bauraiyna jaiǧasqan qala turaly fotokörmege 30-dan astam arheologiialyq tarihi jädıger men 100-ge juyq fotosuret qoiyldy.
Körmenı aşqan Almaty qalasynyŋ äkımı Bauyrjan Baibek körmenıŋ taqyrybyna toqtaldy. Onyŋ aituynşa, Qazaqstan Konstitusiiasy, egemendık turaly deklarasiia, ūlttyq valiutamyz – teŋgenı şyǧaru turaly şeşım Almatyda qabyldandy. Semei poligonyn jabu turaly Jarlyq ta būl şaharda şyǧaryldy. Sondyqtan taŋ-dalǧan taqyryp ta körmege sai kelıp tūr.
Al QR Ūlttyq akademiialyq kıtaphanasynda almatylyq aqyndar oqyrmandarmen kezdestı. Olardyŋ arasynda kielı Türkıstannyŋ keşegısı men bügıngısın jyrǧa qosqan Qasymhan Begmanov, «Tūlparǧa mıngen ūly dalanyŋ, tarpaŋ mınezdı ūly bolamyn» dep jyrlaityn Maraltai Raiymbekūly, S.Mūqanov pen Ǧ.Müsırepovtıŋ memlekettık ädebi-memorialdyq muzei keşenınıŋ direktory Ädılǧazy Qaiyrbekov, Janarbek Äşımjan, Esei Jeŋısūly syndy belgılı aqyndar boldy. Almatydan arnaiy kelgen qoǧam qairatkerı, qazaq tılınıŋ janaşyry Asyly Osman kelelı äŋgıme örbıttı.
El Täuelsızdıgınıŋ şirek ǧasyrlyq mereitoiy men qalanyŋ myŋ jyldyǧyna orai Almaty ruhaniiatynda biyl eleulı jaŋalyqtar oryn aldy. Jaqynda qalada «Alatau» dästürlı öner teatry men dästürlı muzykanyŋ multimediialyq ortalyǧy aşyldy. Almaty äkımınıŋ orynbasary Arman Qyryqbaevtyŋ sözınşe, endı jaqynda qala tarihyna arnalǧan mūrajai esıgın şalqaita aşpaq.
Ötken senbı künı Beibıtşılık jäne kelısım saraiynda Almatynyŋ estrada-simfoniialyq orkestrı jäne qazaqstandyq estrada jūldyzdarynyŋ qatysuymen QR Täuelsızdıgınıŋ 25 jyldyǧyna arnalǧan gala-konsert ötıp, onda Aiqyn Tölepbergen, Luina, Dimaş Qūdaibergen, Diana Şarapova, Äli Oqapov, «MuzArt» ansamblı, «Qoŋyr», «KeşIý», «Jıgıtter», «Saryn» jäne «Ringo» toptary än saldy.
Al jeksenbı künı būl saraida dästürlı muzyka ökılderı astanalyqtardy «Mäŋgılık mūrat» atty konsertte än-küimen susyndatty. Olardyŋ arasynda «Sazgen sazy» folklorlyq-etnografiialyq orkestrı, Nūrjan Janpeiısov, Talǧat Äbuǧazy, Aigül Qosanova, Şolpan Darjanova, Ūljan Baibosynova, Tıleules Qūrmanǧaliev syndy änşıler, küişıler men jyrşylar bolyp, ūlttyq muzykanyŋ mäiegın ūsyndy.
Teatr süier qauym da nazardan tys qalmady. Almatydaǧy Memlekettık quyrşaq teatry Astana qalasynyŋ Q.Quanyşbaev atyndaǧy memlekettık akademiialyq qazaq muzykalyq drama teatrynyŋ sahnasynda «Altyn Adam» epikalyq spektaklın jäne balalarǧa arnap «Kukly şou» merekelık qoiylymyn qoidy.
Amanǧali QALJANOV
