«MuzArttyŋ» oryndauyndaǧy osy ändı estımegen adam kemde-kem şyǧar, sırä. Näzık jandylarǧa arnalǧan būl ännıŋ beinebaiany da erekşe. Köşe boiyn kezıp jürıp, jolynda kezdesken qyzdarǧa gül şoǧyn syilaǧan jıgıt esterıŋızde bolar. 8 nauryz merekesıne orai «Astana aqşamy» gazetı sol jıgıttıŋ ızın jalǧady.
Nauryzda jauǧan alǧaşqy jaŋbyr qys qūşaǧynda ūzaq bolǧan tabiǧatty oiatyp, köktemdı şaqyrǧandai boldy. Qyp-qyzyl gül şoqtaryn alyp, fototılşımen «Bäiterektıŋ» boiyn jaǧalai bastadyq. Kenet qarsy aldymyzdan tal şybyqtai būralǧan qyzdyŋ sūlbasy körındı. Jaqyndai kelgende, güldı ūsyndyq. Mūndai äreketke riza bolǧan Äsel esımdı sūlu boijetkendı «syrt» etkızıp suretke tüsırıp aldyq. Oilaǧanymyz – köşede qabaǧy tūnjyraǧan, asyǧyp jürgen qyz-kelınşekterdıŋ köŋılın bır sät bolsyn aulap, merekelık köŋıl-küi syilau.
«Bäiterek» alaŋynan şyǧyp, «Keruenge» bettedık. Qol ūstasyp kele jatqan qyz ben jıgıttı baiqap qaldyq. «Aqşamǧa» oratylǧan gül şoǧyn jıgıttıŋ qolyna ūstatyp jıbergenımız sol edı, jıgıt güldı qyzǧa tabystap ülgerdı. Äp-ädemı körınıstı qaz-qalpynda fotoapparattyŋ obektivıne tüsırıp aldyq. Kütpegen jerden qūttyqtaǧanda boijetkennıŋ jüzı qyzaryŋqyrap qaldy. Külımsıregen boiy jas jūppen qoş aitystyq.
Keptelıste tūrǧan temır kölıktegı arulardy da nazardan tys qaldyrmaudy jön kördık. Şynaiy quanyşyn jasyrmaǧan beitanys kelınşek köktemdı qarsy aluǧa daiyn bolyp körındı bızge.
Künı-tünı jūmysy bır tolastamaǧan avtobus konduktory da qarbalas tırşılıktı bır sätke ūmytyp, quansyn dedık. Aialdamaǧa taqaǧan avtobusty taǧy bıraz kıdırtıp, apaidy gülımen bırge suretke tüsırdık.
Meiramhanaǧa kelgen qonaqtardy ärdaiym ädemı külkısımen qarsy alatyn qyzdarǧa da bır uaqyt kütım qajet, jıgıtter! Sondyqtan äkımşıden rūqsat sūrap, kassa aldynda tūrǧan sūlu qyzdyŋ fotosyn da estelıkke dep tüsırıp aldyq.
8 nauryzǧa arnaiy 8 gül şoǧyn kezdeisoq qyz-kelınşekterge tabystaǧanda tüigenımız, merekege erekşe reŋk beru op-oŋai. Al aluan türlı güldermen kömkerılgen mekemeler men saiabaqtar köktemnıŋ auyly alys emes ekenın bıldıretındei.
Güldana TALǦATQYZY
