Keşe Türkiia astanasy Ankara qalasynda Äkımşılık qalalardyŋ düniejüzılık forumy öttı. Jiyn qorytyndysynda Nūr-Sūltan qalasy 2021 jyly Äkımşılık qalalardyŋ düniejüzılık qauymdastyǧyna (WACA) töraǧalyq etetını jariialandy.
Astanalyq delegasiiany qala äkımınıŋ orynbasary Baqtiiar Mäken basqaryp bardy.
Būl jiynda Ankara qalasynda atqarylǧan ıs-şaralardyŋ qorytyndysy jariialanyp, şaharlar arasyndaǧy yntymaqtastyqty arttyru sekıldı taqyryptar talqylandy. Sonyŋ ışınde mädeni-äleumettık, ekonomikalyq jäne täjıribe almasu mäselelerı qarastyryldy.
Būdan bölek, Ankara meriiasy qūramyndaǧy jol qozǧalysyn retteitın ortalyqtyŋ jūmysy tanystyryldy. Onda qoǧamdyq kölıkterdıŋ, olardyŋ jürgızuşılerınıŋ, baqylau kameralarynyŋ jūmysy jūrtşylyq nazaryna ūsynyldy. Ankara meriiasynyŋ qūramynda 360-tan astam videokamera qūrylǧan.
Aita keteiık, eŋ alǧaşqy WACA forumy 2017 jyly Oŋtüstık Koreiada, Sedjon qalasynda ötken bolatyn. Onyŋ qatysuşylary özara täjıribe men äkımşılık qalalarǧa keletın syn-qaterlerdı talqylaǧan.
Sonyŋ nätijesınde WACA yntymaqtastyqty odan ärı damytu üşın tūraqty halyqaralyq platforma qūru turaly şeşım qabyldady.
Jaŋa astanalar men qūrylatyn äkımşılık qalalar ǧana WACA-nyŋ resmi müşelerı bola alady. Mūndai qalalardy qūru men damytuǧa bailanysty elder, memlekettık organdar, ükımettık emes ūiymdar men mamandar assosiativtı müşe bola alady.
Nūr-Sūltannyŋ bıregei ülgısın jäne damuyn eskere otyryp, Ankara Qazaqstan astanasyna ūiym qūramyna kırudı jäne odan ärı kongress jūmysyna tūraqty türde qatysudy ūsyndy.
Aian BEKJANŪLY
