«Astana aqşamy» gazetınıŋ jaryqqa şyǧa bastaǧanyna 27 jyl toldy. Osy aituly künge orai basylym ūjymy «Astana qalasy äkımdıgınıŋ «Şarapat» äleumettık qyzmet körsetu ortalyǧy» memlekettık mekemesınde bolyp, osynda tūratyn oqyrmandarmen kezdestı.
Būl mekemede bügınde 328 adam tūrady. Olardyŋ ışınde – 183 qart kısı bolsa, 145 adam mügedek jan. Mūnda qamqorlyqqa mūqtaj azamattardyŋ ömır süruı üşın barlyq jaǧdai jasalǧan.
– Bızdıŋ mekemege qabyldanatyn adamdardy Astana qalasynyŋ Jūmyspen qamtu jäne äleumettık baǧdarlamalar basqarmasy aiasynda qūrylǧan komissiia anyqtaidy. Būl, negızınen, jalǧyzbasty qart adamdar, kütuşısı joq mügedek adamdar, sondai-aq, bala-şaǧasy qarai almaityn egde erlı-zaiyptylar. Mūnda äleumettık-tūrmystyq jaǧdaidyŋ bärı jasalǧan. Bes mezgıl tamaqtanu, medisinalyq qyzmet körsetu ūdaiy jürgızıledı, – deidı «Şapaǧat» äleumettık qyzmet körsetu ortalyǧynyŋ direktory Kenjebolat Bäpışev.
Mekeme tūrǧyndarynyŋ tynys-tırşılıgımen tanystyrǧan direktordyŋ äleumettık jūmys jönındegı orynbasary Janar Esenamanova aldymen eŋbek terapiiasy bölmesıne bastap bardy. Mūnda gül, ösımdık ösırumen ainalysuǧa mümkındık jasalǧan.
– Men osynda kelgenıme ekı jyldai boldy. Ösımdık ösıremın. Gülderdı qystai osynda baptap, jazda dalaǧa şyǧaramyz. Osy maŋaidyŋ bärın jainatyp qoiamyz, – deidı özın Jūmaǧazy Sarbasov dep tanystyrǧan zeinetker.
Al «Qoldanbaly öner» bölmesıne kelgenımızde de jūmys qyzyp jatyr eken. Oiu-örnekpen ainalysatyn Janbolat Beisenbaev körpe, tösekşe jasaitynyn, tıpten «qyzdyŋ jasauyn» daiyndaitynyn aityp maqtanyp qoidy.
Osy mekemede 1989 jyldan berı ısteitın meiırbike Ǧaliia Töleuovany mügedek jannyŋ qan qysymyn ölşep jatqan sätınde jolyqtyrdyq. «Bızdıŋ jūmysymyz täulık boiy üzılıssız jürgızıledı. Öitkenı mūnda qamqorlyq pen meiırımdılıkke asa mūqtaj jandar tūrady ǧoi. Sondyqtan da bız, därıgerler men kütuşıler olarǧa meilınşe sapaly ärı jyly şyraimen qyzmet körsetemız» dedı täjıribelı meiırbike öz jūmysynyŋ jauapkerşılıgın meŋzep.
Mekemenıŋ kıtaphanasy da tūrǧyndardyŋ jiı bas qosatyn jaily orny eken. Bız kırıp kelgende Amanjol Baişin degen azamat «Astana aqşamy» gazetın oqyp otyr eken. Äŋgımemız bırden jarasyp kettı.
– Bızde kıtaphanaǧa keluşıler köp. Al «Astana aqşamy» gazetın tūraqty oqyp tūramyz. Öitkenı osy gazet arqyly elımızdegı, Astanamyzdaǧy barlyq oqiǧalardy bılıp otyramyz. Jäne būl gazet bızdıŋ mekeme jaiynda da jazyp tūrady. Oily maqala oqyrman oljasy ǧoi. Sızderdıŋ gazette oqylatyn qyzyqty maqalalar jiı şyǧady. Osylai jalǧastyra berıŋızder. Tüptep aitsam, bızde sızderdıŋ gazettıŋ oqyrmandary köp, – deidı Amanjol aǧa köŋılı köterılıp.
İä, däl qazırgıdei baspasözge jazylu nauqany jürıp jatqan kezeŋde oqyrmandar tarapynan osyndai jyly söz, igı tılek estıgennen janymyz marqaidy.
Ǧalym QOJABEKOV
