Astanadaǧy Oquşylar saraiynda halyqaralyq baldyq bi oryndauşylardyŋ «SILK WAY» festivalı öttı. Oǧan 600-den astam jetkınşekter qatysty.
Aituly şaranyŋ maqsaty – Ūly Jıbek jolynda toǧysqan memleketterdıŋ dostyǧyn nyǧaityp, mädeni jäne şyǧarmaşylyq bailanystardy jetıldıru. Baiqauǧa İzrail, Gruziia, Resei, Belarus, Ukraina, Koreia, Äzerbaijan, Özbekstan jäne Qazaqstan sekıldı elderden daryndy balalar qatysty. 7-17 jastaǧy jas örender jetı atalym boiynşa baq synasty. Äsırese, olar baiau vals, vena valsı, klassikalyq bi, älem halyqtarynyŋ bilerı, halyq biı sekıldı baǧyttar boiynşa öz önerlerın jūrtşylyqqa ūsyndy. Äsem qimyldarymen körermenderdı täntı ete bıldı. Bala bolsa da, bidıŋ qyr-syryn jetık meŋgergen şeberlıkterı de süisınttı. Halyq biı men bügıngı zaman bilerın ūştastyrǧan qabıletterı de keremet. Bızdıŋ eldıŋ namysyn qorǧaǧan balǧyndar da myŋ būralyp, tamaşa biledı.
– Jarys joǧary deŋgeide öttı. Bızdıŋ balalar özge elderden kelgen qatysuşylardan eş kem emes. Kiımderımen de, tehnikalyq jaǧynan özgeşe körındı. Sonymen bırge biyl jas sanattary özgertıldı, baiqauǧa kışı topty da qatystyrdyq, – dedı Oquşylar saraiy direktorynyŋ orynbasary Qymbat Irgebaeva.
Sonymen, festival qorytyndysy boiynşa jalpykomandalyq esepte Ukraina bişılerı top jardy. Ekınşı jüldenı – İzrailden kelgen örender ielense, üşınşı oryn bızdıŋ eldıŋ jetkınşekterıne būiyrdy. Sondai-aq, Oquşylar saraiynan qatysqan «Nūrşaşu» men «Jıger» bi toptary «Ūlttyq bi» jäne «Zamanaui biler» atalymynda üzdık şyqty. Halyqaralyq baiqauǧa qatysqan jas önerpazdardyŋ barlyǧy baǧaly syilyqtarmen marapattaldy.
Eŋlık AHMETJANOVA,
L. N.Gumilev atyndaǧy Euraziia ūlttyq universitetınıŋ 2-kurs studentı
