Elordada Halyqaralyq türme reformasy PRI ūiymynyŋ Ortalyq Aziiadaǧy ökıldıgınıŋ ūiymdastyruymen «Türme jüiesın damytudyŋ jahandyq trendterı» taqyrybynda baspasöz konferensiiasy öttı. Būl şara Elbasy ūsynǧan Ūlt josparynyŋ 33-qadamyn ıske asyru aiasynda ūiymdastyrylyp otyr.
Jiyn barysynda Halyqaralyq ūiym ökıldıgınıŋ aimaqtyq direktory Azamat Şambilov jazasyn ötep jatqan äielderdıŋ qūqyǧyn qorǧaityn «Bangkok erejesı» men elımızdegı balalardyŋ qūqyǧyn qorǧaityn Ombudsmen qyzmetı turaly aitty. Sondai-aq, ol kämeletke tolmaǧan jazasyn öteuşıler jaily söz qozǧap, Gruziia täjıribesın mysalǧa keltırdı. Jazasyn ötep şyqqan gruziialyq jasöspırımderdıŋ ömırbaianynan sottalǧandyǧy jaiynda derek öşırıledı eken. Būl – tura jolǧa tüsıp, tüzelem degen jastar üşın taptyrmas mümkındık ekenı anyq. Bır ökınıştısı, elımızde 70-ke juyq kämeletke tolmaǧan bala koloniiada jazalaryn ötep jatyr. Osy mäselege qynjylys bıldırgen A.Şambilov atalǧan mäselenı özgedei joldarmen şeşıp, balalarǧa basqaşa jaǧdai jasau kerektıgın alǧa tartty.
Al Işkı ıster ministrlıgıne qarasty Qylmystyq-atqaru jüiesı komitetı töraǧasynyŋ orynbasary Azamat Bazylbekov jazasyn öteuşılerge kigızıletın elektrondy bılezıktıŋ qyr-syryn baiandady. Onyŋ aituynşa, būl jūmys qazır zaŋdylyq tarapynan talqylanu üstınde, 2018 jylǧa qarai aiaqtalyp qalady.
Kelesı kezekte söz alǧan halyqaralyq sarapşy, Moldova Respublikasy Probasiia qyzmetınıŋ basşysy Vladimir Popa öz elderındegı ahualmen bölıstı. Qazırgı kezde Moldova Respublikasynda 16-17 türme men 6-7 myŋdai jazasyn öteuşı bar eken. Jazasyn öteuşılerdıŋ sany boiynşa 45-orynda tūrǧan Qazaqstan men Moldovanyŋ erekşelıkterıne toqtalǧan ol halyqaralyq zaŋnamalar jaily aqparat berdı.
Materialdy “Astana aqşamy” gazetınıŋ astana-akshamy.kz resmi saityna sılteme jasaǧanda ǧana paidalanuǧa rūqsat etıledı.
