Ötken senbı-jeksenbı künderı dästürlı auyl şaruaşylyq önımderınıŋ järmeŋkesınde Oŋtüstık Qazaqstan jäne Jambyl oblystary şarualarynyŋ dämı saudalandy. Būl öŋırlerdıŋ jalpy qūny 85 mln teŋgenıŋ 700 tonnaǧa juyq azyq-tülık tauary elordaǧa äkelıngen.Oŋtüstık Qazaqstan oblysyn järmeŋkege bastap kelgen oblystyq Auyl şaruaşylyǧy basqarmasynyŋ basşysy Qanatbek Ospanbekovtıŋ aituynşa, Şymkent öŋırınen Astanaǧa negızınen kökönıs pen jemıs jetkızılgen. Sondai-aq, oŋtüstıktıkter astanalyq tūtynuşyǧa süt jäne baqşa önımderın ūsyndy.
Jambyl oblysynyŋ 10 audany men Taraz qalasynan äkelıngen tauarlardyŋ da negızgı bölıgın kökönıs pen jemıs qūrady (150 tonna). Jambyldyqtar «jese – tıske, jemese – tüske kıretın» ettı de äkeludı ūmytpapty. Kökönıs-jemıspen bırge 5 tonna balyq, 4 tonnaǧa jaqyn süt önımı bas qalamyzǧa keldı. Mūndai aqparatty bızge Jambyl oblysy äkımınıŋ orynbasary Mūratbai Joldasbaev aitty.
Saudaǧa tüsken önımderdıŋ baǧasyn aitar bolsaq, olar naryqtaǧy baǧadan 10-15 paiyzǧa tömen satyldy. Mäselen, kökönıs baǧasy 35-70 teŋge şamasynda boldy. Atap aitar bolsaq, qyryqqabat pen piiaz, bolgar būryşy – 35 teŋgeden, säbız – 40 teŋgeden, qyzanaq – 60 teŋgeden, qyzylşa men qiiar 70 teŋgeden saudalandy.
«Qazagromarketing» AQ-nyŋ et baǧasyna jürgızgen monitoringıne sensek, astanalyqtar eŋ arzan ettı «Şapaǧat» bazarynan ala alady. Ondaǧy qoi etınıŋ baǧasy – 1050 teŋge bolsa, siyr etı – 980 teŋgeden, al jylqy etı – 1200 teŋgeden saudalanuda. Järmeŋkede qoi etı – 900 teŋgeden, siyr etı – 950 teŋgeden, jylqy etı 1150 teŋgeden satyldy. Şolpan Qyrqymbai esımdı tūtynuşy: «Mūndaǧy et baǧasy «Şapaǧattykınen» 30-50 teŋge ǧana arzan bolsa da, bır zeinetaqyǧa qaraǧan bızderge būl äjepteuır kömek» deidı.
Esterıŋızge salyp öteiık, auyl şaruaşylyq önımderınıŋ järmeŋkesı 3 qaraşaǧa deiın sozylady. Aldaǧy demalystarda, 28-29 qyrküiek künderı elordalyqtarǧa Qaraǧandy oblysynyŋ auyl eŋbekkerlerı öz önımderın ūsynady.
Amanǧali QALJANOV
