QR Mädeniet jäne sport ministrlıgı Bailanys jäne aqparat qyzmetkerlerı künı qarsaŋynda «Memlekettık tıl jäne BAQ» respublikalyq baiqauynyŋ jeŋımpazdaryn marapattau räsımın ötkızdı. Ministr Arystanbek Mūhamediūly tıldıŋ damuyna airyqşa üles qosyp jürgen törtınşı bilık ökılderın merekelerımen qūttyqtap, qūrmet gramotalary men alǧys hattaryn tapsyrdy.
Merekelık şaraǧa QR Parlamentınıŋ deputattary, BAQ ökılderı, ǧalymdar, jazuşylar qatysyp, estrada jūldyzdary öner körsettı.
Saltanatty jiynda Arystanbek Mūhamediūly būqaralyq aqparat qūraldary eldıŋ älemdık aqparattyq jäne mädeni keŋıstıktegı ornyn anyqtap, är memlekettıŋ ışınde ǧana emes, elder men halyqtar arasyndaǧy qoǧamdyq qatynastardyŋ damuyna äser etetındıgın atap öttı.
QR MSM Tılderdı damytu men qoǧamdyq-saiasi jūmys komitetı Ş.Şaiahmetov atyndaǧy Tılderdı damytudyŋ respublikalyq üilestıru-ädıstemelık ortalyǧymen bırlese ūiymdastyrǧan «Memlekettık tıl jäne BAQ» respublikalyq baiqauynyŋ jeŋımpazdaryna diplomdaryn senator, Jazuşylar odaǧynyŋ töraǧasy Nūrlan Orazalin bastaǧan qazylar alqasynyŋ müşelerı tabystady.
Baiqauǧa memlekettık tıldıŋ ahualy turaly 200-den asa ötkır de özektı materialdar kelıp tüsıptı. Qazylar alqasy qatysuşylardy «Üzdık maqala», «Üzdık telearna baǧdarlamasy», «Üzdık radio baǧdarlamasy», «Üzdık sait maqalasy» nominasiialary boiynşa baǧalady.
Üzdık maqala avtory «Egemen Qazaqstan» respublikalyq gazetınıŋ şoluşysy Süleimen Mämet atandy. Top ışınen ärıptesımız, «Astana aqşamy» gazetınıŋ aǧa tılşısı Orynbek Ötemūrat ta erekşelenıp, yntalandyru syilyǧyna ie boldy.
Ǧalym QOJABEKOV
