Otanyŋdy tanyp bıl
Elordada «Ruhani jaŋǧyru» baǧdarlamasy aiasynda astanalyq jas ölketanuşylardyŋ forumy ötıp, üzdıkterı marapattaldy.
Aldymen «Jalyn» patriottyq qozǧalysynyŋ saiahatşylary özderı jürıp ötken ekspedisiiamen tanystyrdy. Ekspedisiianyŋ maqsaty – ölketanu turizmın qalyptastyru, oǧan mümkındık beretın tabiǧi, tarihi jäne äleumettık-ekonomikalyq nysandardyŋ jol kartasyn jasau. Oquşylar Raiymbek batyr atyndaǧy «Qazǧaryş» mektep-liseiınıŋ geografiia pänınıŋ mūǧalımı, «Ölketanu» jobasynyŋ jetekşısı Qabanbai Jaqypovpen bırge tarihy tereŋ jerlerge saiahattady. Olardyŋ ışınde Aiaqqamyr mazary, Qaraşaş ana mazary, İbragim ata kesenesı, Sairam, Otyrar, Türkıstan, Qazyǧūrt, Ūlytau, Şaryn şatqaly, Ereimentau, Üstırt siiaqty kielı jerler bar.
№40 mekteptıŋ 9-synyp oquşysy Arujan Qoianbaeva: «Mekteptıŋ ekspedisiiasymen elımızdıŋ körnektı jerlerıne saiahat jasadyq. Osy uaqytqa deiın Jezqazǧan, Baianauyl, Türkıstan, Syrymbet ölkesıne bardyq. Qazaqstannyŋ keŋ-baitaq jerın körıp, barǧan saiyn ärtürlı äser alatynymyz anyq. Balalar būl jerlerdı zerttep qana qoimai, onyŋ tarihyn tereŋ tüsınıp, köptegen qyzyqty mälımettermen tanystyq. Biyl da «Ruhani jaŋǧyru» baǧdarlamasy aiasynda jolǧa şyǧuǧa äzırlenıp otyrmyz» dep saiahattan keiıngı öz äserlerımen bölıstı.
Bırınşı kezeŋ jeŋımpazdarynyŋ bırı №13 orta mektebı Astana qalasynda turizmge baǧyttalǧan mektep bolyp sanalady. Balalar biıktıgı 4010 metrlık Abai şyŋyna şyqqanymyz erekşe este jattalyp qaldy deidı. Sondai-aq, qazaqtyŋ bırneşe hany taqta otyrǧan Ūlytau öŋırındegı Han ordasyn öz közderımen körıp qaitty.
Biyl elordalyq mektep pen kolledjderınde ekspedisiialyq toptar qūrylyp, ekı myŋnan astam oquşy saiahatqa şyǧady dep kütılude.
Forum soŋynda jas saiahatşylarǧa maqtau qaǧazdary men jüldelı oryn iegerlerıne syilyqtar tabystaldy.
Güldana TALǦATQYZY