Ötken jeksenbıde elorda tūrǧyndary men qonaqtary halyqaralyq Otbasy künın Astanalyq parkte atap öttı. Osy künı jetı komanda köŋıldı jarystarda bäsekege tüstı.
Sporttyq merekege balalar men eresekter qatysty. Ata-analar men balalar eptılık pen jyldamdyq qabıletterın körsetetın jarystarda synǧa tüstı. Köŋıldı start baǧdarlamasyna asyq atu men arqan tartu siiaqty ūlttyq oiyndar da endı.
– Halyqaralyq otbasy künı 1993 jyly bekıtılıp, jyl saiyn 15 mamyrda atalyp ötıledı. Bız otbasylyq jarystar, saiahattar jäne t.b ötkızemız. Būl joly mereke saiabaqta jattyǧu jasaudan bastaldy. Sodan keiın kezek jarystarǧa berıldı, – dedı Astana qalasy salauatty ömır saltyn qalyptastyru ortalyǧynyŋ direktory Aqmaral Qūrmanbaeva.
Ädenovter äuletı osy siiaqty būqaralyq şaralarǧa bükıl otbasymen quana qatysady. Olar bügın de tys qalǧan joq.
– Ädettegıdei, bükıl otbasymyzben keldık. Är demalys saiyn taza auaǧa şyǧyp otyruǧa tyrysamyz, qalalyq saiabaqtarda ūiymdastyrylatyn oiyn-sauyqtarǧa qatysyp jüremız. Osyndai qyzyqty sporttyq jarystar ötkızu – tamaşa ideia, mūndai şaralardy jiı ūiymdastyrǧan dūrys, – dep Asqar Äden öz pıkırımen bölıstı.
Astanalyq parkte 8 mamyrdan bastap demalys künderı aşyq aspan astynda būqaralyq sporttyq jäne fitnes jattyǧular jasau ūiymdastyrylyp keledı. Täjıribelı nūsqauşylardyŋ jetekşılıgımen ioga, zumba jäne krossfitten sabaq aluǧa bolady.
