Ūlystyŋ Ūly künı qarsaŋynda, 15 nauryzda Qazaqstandaǧy Özbekstannyŋ jyly saltanatty türde aşyldy. Al 2019 jyl Özbekstandaǧy Qazaqstan jyly bolyp bekıtıldı.
Būl oqiǧalar – bauyrlas ekı halyqtyŋ dostyǧy men yntymaqtastyǧynyŋ joǧary deŋgeige köterılgenınıŋ aiqyn körınısı. Atap aitarlyǧy, biyl Astanada türkı halyqtaryna ortaq oişyl, memleket qairatkerı Älışer Nauaige eŋselı eskertkış ornatylady. Al özbek halqy qazaqtyŋ bas aqyny Abai Qūnanbaiūlyn ūlyqtaidy.
Özbek ǧalymdary Abai atamyzdyŋ ūly mūrasyn zerttep, özbek halqy Abaidyŋ danalyǧymen öz ruhaniiatyn baiytady. Juyrda Özbekstan prezidentı Şavkat Mirzieev Abai Qūnanbaiūlynyŋ şyǧarmaşylyq mūrasyn nasihattau turaly qaulyǧa qol qoidy. «Ūly aqyn, oişyl Abai Qūnanbaiūlynyŋ esımı häm onyŋ şyǧarmaşylyq bai mūrasy – gumanizm men ızgılıktıŋ eŋ joǧarǧy idealy. Ol tek qazaq halqyna ǧana emes, bükıl türkı jūrtyna, sonyŋ ışınde bızdıŋ özbek halqy üşın de öşpes ız, bai ruhani mūra qaldyrdy. Abai Qūnanbaiūlynyŋ bar ömırı men şyǧarmaşylyǧy Otanǧa qaltqysyz adal qyzmet etudıŋ, onyŋ ūlttyq qūndylyqtaryn süiudıŋ jarqyn ülgısı» delıngen qūjatta.
Būl qadam özbek jastarynyŋ qazaq ädebietımen, sonyŋ ışınde Abai atamyzdyŋ şyǧarmalarymen susyndauyna jol aşady. Öitkenı jyl saiyn özbek studentterı arasynda «Abai şyǧarmalarynyŋ bılgırı» degen baiqau ötetın boldy. Būǧan qosa, Abaidyŋ taŋdamaly şyǧarmalar jinaǧy, «Özbek-qazaq ädebi bailanystary» atty ädebi-saraptama maqalalar jinaǧy şyǧarylady. Jyl saiyn 10 tamyzda Taşkenttegı Abai eskertkışı aldynda saltanatty şara ötkızu, Nizami atyndaǧy memlekettık universitette tūraqty körme ūiymdastyru, aqynnyŋ ömırı men şyǧarmaşylyǧyn qoǧamda, BAQ-tarda keŋınen nasihattau josparlanǧan. Şavkat Mirzieevtıŋ būl parasatty qadamy ekı halyqtyŋ ruhani jaqyndasuyn odan ärı nyǧaita tüserı sözsız.
Tölen TILEUBAI
