«Qazaqstanda jasalǧan». Būl – tauardyŋ japsyrma qaǧazynda jazylǧan taŋba. Bıreu bılmes, bıreu senbes. Bıraq, otandyq önımnıŋ öŋı kırıp, örısı keŋeie tüsken kez kelıp jettı. Mäselen, jaqynda ǧana «Astana Mall» sauda ortalyǧynda «Qazaqstanda jasalǧan» körme-järmeŋkesi öttı. QR Tūŋǧyş Prezidenti künine orailastyrǧan şarada 50-ge juyq käsıporyn önımderın ūsyndy. Järmeŋkege kelgender üige qajettı būiymdardan bastap, jūmysqa kietın kostium-şalbarǧa deiın otandyq tauarlardy satyp aldy. Ūiymdastyruşy – «NADLoC» Jergilikti qamtudy damytudyŋ ūlttyq agenttigi.
Būl qarqynnyŋ qaşan jäne qalai qaryştaǧanyn eske tüsıreiık.
Osy jyldyŋ aqpan aiynda Ükımettıŋ keŋeitılgen otyrysynda Elbasy «Qazaqstanda jasalǧan» aksiiasyn ūiymdastyrudy ūsynǧan edı. Halyq üşın kürdelı kezeŋde bır-bırımızdı demep, otandyq önımdı satyp aluǧa şaqyrǧan bolatyn. Irı düken jelılerı būl aksiiany qoldap, sauda sörelerıne otandyq önımdı aişyqtaityn türlı-tüstı taqtaişalar jasady. Tūtynuşylar da otandyq önımdı satyp alyp, är qyrynan saraptauǧa da aianbady. Osy jyl önımderımızdıŋ tanymaldyǧy men taralymy artqan jyl dep aituǧa äbden bolady. Nūrsūltan Nazarbaevtyŋ «Qazaqstandyq käsıpkerlık ūlttyq ekonomikany alǧa süireitın negızgı küşke ainaluy tiıs» degen sözı elımızdegı käsıpkerlıktıŋ damuyna arqau bolyp keledı.
Prezidentımız özınıŋ oiyn tek sözımen emes, ısımen de däleldei bıledı. Sondyqtan bolar, otandyq kostium men aiaq kiım kiedı. Atyrauda ötken oblys äkımderınıŋ kezdesuınde N.Nazarbaev özın mysalǧa keltırıp, «bızdıŋ jeŋıl önerkäsıptı jarnamalauşymyn» degen edı. «Üstımdegı kostium Qazaqstanda şyǧarylǧan» dep, Prezident pidjagynyŋ astaryndaǧy japsyrma qaǧazdy körsettı. «Tufliım de qazaqstandyq» dep sözın jalǧady. Elbasy jiynda İnvestisiialar jäne damu ministrı Äset İsekeşevtı körsetıp, onyŋ da kostiumı özımızdıkı ekendıgın aitty.
Al qazan aiynyŋ soŋynda Memleket basşysy «Qazjeŋılönerkäsıp – Almaty» käsıpornynda boldy. Däl osy mekemede Nūrsūltan Nazarbaevqa arnalǧan kiımder tıgıldı. Joǧary sapaly matalardan klassikalyq kostium men şalbar, 42-ölşemdegı aiaq kiım qoldan jasaldy. Bırınşısı – «Oksford» stilınde, iaǧni bätıŋkelerdıŋ bauy bailanady, ekınşı ülgı – «Lofer», bausyz aiaq kiım. Käsıporyn basşysy Aibek Bektūrǧanovtyŋ aituynşa, Elbasyna arnalǧan «Made in Kazakhstan» toptamasyn ūsynu üşın bırneşe kün kettı. Önerkäsıp qyzmet etıp kele jatqan 2 jyldyŋ ışınde 55 million jūp aiaq kiım eksportqa şyǧarylǧan.
– Barşa qazaqstandyqtarǧa özımızdıŋ otandyq tauarlardy, sonyŋ ışınde «Made in Kazakhstan» belgısı bar aiaq kiımder men kostiumderdı satyp alu qajettıgın aitqym keledı. Eger jeŋıl önerkäsıp ılgerı basatyn bolsa, sala käsıporyndarynda jūmys ısteitınder eŋbekaqy alyp, memleketke salyq töleidı. Būl bärıne tiımdı – biudjetke tüsım tüsedı, elde özımızdıŋ öndırgen tauarlarymyz paida bolady. Būl oraida önım sapasyn ūdaiy jetıldırıp otyrǧan jön, – dedı Elbasy kezdesu barysynda.
Öz ısımen ainalysam degen adamǧa ekı qolǧa bır kürek te, qarjylandyru közı de tabylady. Mäselen, «Menıŋ Elbasym» dep atalatyn erler toptamasynyŋ avtory Aijani Nūrlanovanyŋ ısı bügınde alǧa basuda. 2014 jyldyŋ «Eŋ üzdık äiel käsıpkerı» atanǧan dizainer – «Altyn adam» fabrikasynyŋ Astana qalalyq filialynyŋ direktory. Fabrika 2013 jyldan bastap jūmys ıstep keledı. Mata men syzba ülgı Türkiia men İtaliiadan äkelınedı, al ony özımızdıŋ otandyq mamandar tıgedı. Būl bastamany Elbasy qoldap, odan ärı Oŋtüstık Qazaqstan oblysynyŋ äkımı Beibıt Atamqūlov ta kostium-şalbar satyp aldy. Fabrika minutyna 1, künıne 400 dana kostium daiyndaidy. Bastapqyda qūny 25 myŋ teŋge edı, dollar baǧamynyŋ köterıluıne bailanysty qazırde ony 45 myŋ teŋgege satyp aluǧa bolady.
Elbasy BŪŪ-daǧy jiynǧa, Sochidegı prezidentterdıŋ kezdesuıne qūny 45 myŋdyq osy kostium-şalbardy kidı. Onyŋ būl ısı otandyq tauardy qoldaǧysy keletın barşa qazaqstandyqtarǧa ülgı boluy tiıs.
Güldana TALǦATQYZY
