Respublisa partiiasy ökılderınıŋ ügıt-nasihat sapary jalǧasuda. Partiia müşelerı özderınıŋ ReBus markaly avtobusymen elımızde 30 myŋ şaqyrym joldy jürıp öttı. Olar Astana, Almaty, Taldyqorǧan, Şymkent, Qonaev, Taraz, Türkıstan, Qyzylorda, Qostanai, Oral, Aqtöbe, Atyrau, Petropavl, Kökşetau, Pavlodar, Ekıbastūz, Semei, Qaraǧandy, Öskemen qalalaryn, sondai-aq bırqatar auyldardy aralap şyqty.
Jalpy partiia ökılderı elımızdıŋ 18 öŋırıne baryp, tūrǧyndarmen jan-jaqty türlı mäseleler boiynşa äŋgımelestı. Soŋǧy sapar Maŋǧystau men Ūlytau oblysynda ötude. Keşe Pavlodar oblysy Qalqaman auylynda partiiaǧa ötuge bır mezgılde ötınış bergenderdıŋ sany naǧyz rekord ornatty. Halyqpen kezdesu nätijesınde 200 azamat partiia qataryna ötuge ötınış berdı.
Partiia atynan Parlament mäjılısı men qalalyq mäslihattarǧa deputattyqqa ümıtkerler halyqpen kezdesude baǧdarlamadaǧy josparlaryna sai mäselelerdı köterude. Mäselen, Almaty qalasynda ötken jiynda qalalyq mäslihat deputattyǧyna ümıtker Madiiar Janysbaev är qazaqstandyqtyŋ damyǧan qalada tūruǧa qūqyǧy bar ekenın jetkızdı.
– Qalalardy azamattardyŋ ömır süru sapasy boiynşa reitingıleitın jahandyq ömır süruge qabılettılık indeksı bar. Al elımızdıŋ kez kelgen qalasy siiaqty bızdıŋ Almatynyŋ da osy tūrǧydan alǧanda, eŋ joǧary reitingte tūrǧanyn qalaimyn. Osylaişa, inkliuziia ömırdıŋ barlyq salalaryn qamtuy kerek, atap aitqanda, olar – bılım beru, densaulyq saqtau, qalalyq infraqūrylym salalary. Zaǧip jandar nemese mügedekter arbasyndaǧy jandar, qarttar, balaly analar – barlyǧy özderın jaily sezınuı tiıs. Mysaly, mümkındıgı şekteulı jandar sport zaldarǧa, teatrlarǧa, kinoteatrlarǧa qauıpsız jaǧdaida baruy üşın barlyǧy jaqyn ärı jol boiy yŋǧaily boluy kerek, – dedı Janysbaev.
